Gauff tan hna a awlsam

Tennis inelna Miami Masters khelh laiah, hmeichhe player ṭha Coco Gauff chuan amah ang bawka American player Sofia Kenin chu 6-0, 6-0 a sawp chungin third round a in hlangkai.

Gauff hian a vawi khat nan Miami title lak a beisei a, a service hmasa aṭangin 84% zet chu point a hmu thei a, minute 47 chhung lekin a chak thei, game khat mah hloh loin a chak tlang.

Kum 21 mi Gauff chuan, "Ka khel ṭha takzet a, sawisel tur ka nei lo. Chutihtualin keima ṭhat fal vang bik erawh a ni lem lo, ka khingpui khan a chet fuh loh ṭum a tawng ve thung a ni.

"Game hloh miah loa chak hi chu duhthusam a ni a, hetiang ang taka chak tlang erawh hi chu ka beisei ngam bik lo thung," tiin a sawi, a match lehpekah chuan seeded 28-na Maria Sakkari nen an inhmachhawn leh ang.

Inkhel dangah Aryna Sabalenka pawh a chak - seeded pakhatna hian Viktoriya Tomova chu 6-3, 6-0 in a hneh. Indian Wells lama beisei a phak lohna chu a siamṭha chho mek, a match lehpekah chuan Magdalena Frech a hmachhawn leh dawn a ni.

Jasmine Paolini leh Olympic champion Zheng Qinwen te pawh an chak a, inkhel dangah Canadian nula Leylah Fernandez chuan American mi Alycia Parks chu 7-6(1), 6-3 in a hneh ve bawk.