International match enkawl a hlawk thlak - Asawma

India leh Maldives inkhelh ṭuma match commissioner R. Malsawma (Asawma) chuan hmasawnna thar ṭhahnem tak a neih thu Vanglaini a hrilh. Chanmari pa hian Indian Super League leh I League bakah Durand Cup final thlengin match commissoner hna hi a thawk tawh a, Mizoram football tan a hnathawh hi a hlu hle.

JN Stadium (Polo Ground)-ah hian inkhel entu 16,000 an leng a, Shillong-a international match ni mah se mi 6798 chauh an pungkhawm. Asawma chuan, "En man kha Rs 300, Rs 500 leh Rs 800 a ni a, complimentary an siam tam tawk lo nen beisei angin entu an tam tawk lo," tiin a sawi a, an khingpui Maldives hi ranking-ah 162-na daih a ni bawk.

Inkhelh hma ni khatah inhmachhawn turte khelhna hmun turah darkar khat training an nei thei a, Maldives leh India te training duh hun a inang. Asawma chuan, "Training hun hi 6:30 - 7:30 leh 8:00 - 9:00 inkar a ni a, a hmasa zawk an duh ve ve. Maldives lam hi thiam takin ka bia a, a hnuhnung zawkah ka dahsak. Shillong boruak a vawt a, 16C ni mah se a takah chuan 12C ang vel a ni a, hei vang hian training hma hi an duh a ni," tiin a sawi.

Asawma hian nimin khan Aizawl a rawn thleng a, India leh Bangladesh inkhel erawh competitive match a nih avangin match commisioner-ah Indian an awm thei tawh lo. Friendly match pawh hian FIFA ranking-ah nghawng a neih avangin Nepal mi vek match official-ah an hmang a ni.