Man City ke chheh a fuh thei lo

Manchester City-in Etihad Stadium-ah Brighton & Hove Albion an mikhual a, season thara Champions League khel turin point thum mamawh mah se point khat chauh an hlawh chhuak. Inrinni zan inkhelah Pep Guardiola hoten ṭum hnih ngawt hma hruai mah se 2-2 in inkhel a tawp.

City hian match 298 khelin table-ah panganaah an awm a, an elpui Brighton laka point khat chauh an hmuh avangin season thara Champions League khel thei lo thei dinhmunah an ding. Pep-a hote hi Newcastle United-in point hnih chauhin an pha lo a, Magpies hian match khatin an khel tlem.

Pep Guardiola-a'n tlarhnung thuam ṭhat a harsat a, Brighton tlarhma pawhin an su nghing nghal. Kaoru Mitoma-a'n ṭan aṭanga minute rukna lekah a su lut nghal a, mah se City goalkeeper Stefan Ortega laka a foul avangin pawm a ni lo.

City forward Omar Marmoush-a'n minute 11-na lekah penalty a hlawh chhuak a, Erling Haaland-a'n goal-ah a chantir. Pep-a hoten goal khung hma mah se goal venhim an harsat. Minute 21-naah Pervis Estupinan-a'n freekick aṭangin siphurh a sut.

Mualneitu an chungnung leh tho a, Marmoush-a'n hmahruaina remchang hmasa hlah mah se minute 39-naah Egyptian forward hian box pawn aṭangin kawh zetin a pet goal. A ṭum hnih nan City-in hma an hruai a, mihkual team-in second half ṭantirhah siphurh an sut leh tho.

Corner kick aṭanga ball kal chu Adam Webster-a'n tauh lutin box chhunga awm Jack Hinshelwood-a'n goal hnaih zet aṭangin na vak loin goal-ah a pet a, defender Khusanov a per hnuah goal-ah a lut.

Minute 48-naah 2-2 a ni a, Brighton-in khualmualah an khel tih hriain goal venhim hna an thawk. Marmoush-a'n chance ṭha a hlah a, corner kick aṭanga ball kal chu Nico González-a'n goal ban a tauh per.

Mahse, City hi chak phu bik an ni chuang lo. Seagulls-in counter attack aṭangin an vaw let a, Quomah Baleba-a'n goal ruak anga ngaih theih aṭangin a pet over. 2-2 in inkhel a tawp.

Man City boss Pep Guardiola chuan, "Player-ten an theihna zawng zawng an hlan a, point kan hmu a, kan kal zel ang. Ka naute chungah rinna ka nghat a, player naupang zawkte pawh an khel ṭha. Hnehna kan chang teuh a, mah se a tawp kan thleng ta lo," tiin an vanduai thu a sawi.

City-in point thum hlawh chhuak lo mah se Haaland erawhin record thar a siam a, Premier League goal 100-a inrawlh rang ber a ni. Norwegian striker hian match 94 chhung lekin goal 100-ah (84 goals leh 16 assists) a inrawlh. Hemi hmaa record chelhtu chu Alan Shearer a ni a, English striker hian match 100-ah goal 79 leh assist vawi 21 a nei a ni.