Barcelona team doctor a thi

La Liga hmahruaitu Barcelona chu Inrinni zan khan inlan tur ni mah se, an team doctor Carles Minarro Garcia thihna avangin an khelh hun sawn a ni - Catalan club hi ruahman dan chuan Inrinni zan dar 1:30 khan inlan tur an ni a, Osasuna mikhual tur an ni.

Mahse, inkhelh nan minute 20 a la awm tihin inkhelh hi ṭhulh a nih thu puan a ni a, stadium-ah fans awm nual tawh mah se, inkhelh theih a ni ta lo. Barca chuan thuchhuah siamin, "FC Barcelona chuan hrehawm ti tak chungin, first-team doctor Carles Minarro Garcia-a'n min kalsan tak thu kan puan a ngai.

"Hei vang hian FC Barcelona leh CA Osasuna inkhel tur chu a hun sawn a ni a, FC Barcelona board of directors leh staff-te zawng zawng chuan Garcia chhungte leh a ṭhian hnaite kan tawrhpui takzet a ni," an ti.

Barcelona president Joan Laporta chuan, "Mi zawng zawng ngainat a ni a, vawiin tlai khan team hotel-ah a chatthla a ni. Kan hmangaih em em a nih avangin hrehawm kan ti a, kan zinna apiangah zinin, player, coaching staff leh club ami zawng zawngte min enkawltu a ni.

"Tumah a hnar ngai lo a, a hna hrechiangtu doctor ṭha tak a ni. Thil thleng thut a nih avangin kan tan chuan hriatthiam a har a, a nu leh a nupuite pawh kan be tawh a, a fate Gerard leh Anna a kalsan. Player-te pawhin hrehawm an ti a, Carles Minarro leh a chhungte kan zah em avangin kan match khelh tur pawh sawn kan dil ta a ni," a ti.

Nizan khan Barcelona elpui Atletico Madrid leh Real Madrid an inlan a, result kan hre hman lo. Getafe khelmualah Atletico hi an chak chuan Barca pelin, table chung ber an luah ang.