Forest lakah Man City an tlawm
Tun hnaia Premier League thununtu Manchester City-in Inrinni zan khan Nottingham Forest 1-0 in an hneh lo a, chenna ngai loh ramah an cheng mek. Pep Guardiola hote hi an chesual chhunzawm a nih chuan season thara Champions League khel lo thei dinhmunah an ding.
City Ground-ah Callum Huson Odoi-a'n minute 83-naah goal awmchhun a khung a, Man City-in a chhanletna an nei lo. Forest hian point 51 hmuin pathumna dinhmun an sawhnghet a, City erawhin point 47 an hmuin palinaah an awm. Nizan khan Chelsea-in table mawngphaha awm Leicester City an hmachhawn a, Blues hi an chak a nih chuan Man City hi panganaah an tla thla ang.
Goal a pawimawh
Pep Guardiola-a kaihhruai team reng rengin ball an chang tam ṭhin a, Manchester City a enkawl hnuah pawh ball an chang tam zel. Mahse, Pep-a hote hi inkhel thunun chungin an chak lo fo. Inrinni zan inkhelah pawh City-in bul an ṭan ṭha a, Erling Haaland leh Nico González te ball pet, goal pawnah chiah a kal ve ve.
Jeremey Doku pawh a nung ṭha a, box pawn aṭanga a ball pet goal zawnah kal mah se keeper Matz Sels-a'n dang thung. Forest-in point khat hlawhchhuah pawi an ti lo a, chutihrualin counter attack-na tur an zawng ve reng. First half tawp hma deuhin Sels-a ball pet chhuah ṭha chu Chris Wood-a'n um lutin keeper Ederson pet khum a tum a, Brazilian keeper tan hna harsa a ni lo.
Second half-ah Forest an rawn nung hret a, Hudson-Odoi-a'n box chhung lamah ball lain goal-ah ṭha takin pet mah se Ederson-a'n dang perin goal ban a fuh tho a, goal-ah a lut lo. City chungnung chhunzawm mah se goal khung turin Kevin de Bruyne ke a hmui tawk lo a, keeper Sels an paltlang thei lo.
Minute 83-naah Morgan Gibbs-White-a'n mual dinglama awm Hudson Odoi tan ball a vawrhsak a, Forest winger hian box chhung lamah ball khalh lutin goal ṭha bik a khung. Chutihrualin Ederson-a'n a hna a titawk lo a, City Ground-ah inkhel entute thawm a ṭha hle.
City-in siphurh sutna remchang nei mah se Mateo Kovacic-a'n hun ṭha a bawhpelh a, Forest an ṭangtluan. Nuno Espírito Santo hote tan season thara Champions League khelh theihna kawng a inhawng zau ta hle.
Final 10
Manchester City-in Premier League match 10 khelh tur a la nei a, Pep Guardiola-a'n match 10 khelh hmabak chu final-ah a ngai. Spanish manager Pep chuan, "Brigton kan mikhual hun aṭangin final a inṭan dawn. Champions League khel turin match 10 kan la nei a, match khat zela kan khelh hmabak kan thlir chhoh a pawimawh dawn. Season tinin Premier League-in hma a sawn a, final 10 khelh turin min hmuak," tiin a sawi.
Man City hian thlasik bazarah pound maktaduai 180 sengin Nico Gonzalez, Omar Marmoush, Abdukodir Khusanov leh Vitor Reis te an lalut a, an result-ah erawh hmasawnna hmuh tur a la awm lo. Pep Guardiola-a'n league nomawi beisei leh turin nipui bazarah player thar lakluh a mamawh dawn a, player ṭha lalut turin Champions League an khelh phak a pawimawh ang.
Pep-a hote hian Champions League-a Real Madrid an hneh loh vangin Europe inelna aṭanga an sum lakluh tur chu pound maktaduai 28 velin a tlem phah dawn a, season thara UCL an khel pha lo a nih chuan sum lakluh a tlahniam lehzual dawn. City tan UCL khelh phak a pawimawh takzet.