Bul ṭan danah Marquez a lungawi

Marc Marquez chuan MotoGP 2025 season bul a ṭan danah a lungawi tih a sawi a, chutihrualin a team thar Ducati nen chuan hmasawnna tur tam tak an la nei tih a sawi bawk.

Spanish tlangval Marquez hi rider ṭha bik a ni a, mahse hliamin a tlakbuak avangin tun hnai kum thum chhung chu ṭha takin inelna a hmachhawn thei lo, kumin erawh a tir aṭangin a che fuh nghal hle.

Thai Grand Prix tlan zawh taka hnehna changtu Marquez chuan, "Tun anga nuam ti leh inringtawk taka intlansiak ka hmachhawn lohna hi a rei ta hle. Kum 2020 khan Jerez tlan kawngah tuna ka rilru ang hi chu ka lo pu tawh, a hnuah tun ṭum hi a thlen lehna hmasa ber a ni hial.

"Season ṭan hmain inbuatsaihna ka nei ṭha em em a, intlansiak takah a rah kan hmu ta a ni. A nihna takah chuan Jerez 2020 ang khan tunah hian ka awm leh mek," tiin beiseina thar a neih thu a sawi.

Khawvela bike intlansiakna sang ber MotoGP hi March 16 hian an tlan leh dawn a, tun season atana intlansiak pahnihna tur hi Argentina Grand Prix a ni ang.