Lyon coach Fonseca an hrem rei dawn

Referee laka a chet dan mawi lo avangin Lyon manager Paulo Fonseca chuan hremna na tak a tawk, thla kua ngawt mai a naute enkawl thei lo tura hrem a ni.

Tun thlatir khan Lyon hian Brest chu 2-1 in an hneh, he inkhelah hian kum 52 mi Fonseca hi hnawhchhuah niin, official Benoit Millot chu kal chilhin a chal a tauh hial a, ṭawngkam mawi lo a hmang zui bawk.

Nilaini zan khan French Professional Football League chuan thuchhuah siamin, Paulo Fonseca chu November 30 thleng hrem a ni tih an sawi a, hemi hun chhung hian khelmual sir aṭangin a naute a ho thei dawn lo.

Hei bakah hian dressing room lama a kal pawh a rem lo a, match kaihhnawiha official function hrang hrangah pawh a tel phal a ni lo niin an sawi a, a chunga hremna an lekkawh hi a khawng hle.

French champion vawi sarih ni tawh Lyon chuan an coach chunga hremna thleng chu a na lutuk niin an sawi ve thung a, thil thleng a awm hnu lawkah ngaihdam a dil avang leh insawifiahna hun pe loa hrem a ni chu an hrethiam lo tih an sawi ve thung a ni.