Playoff khel turin Cleveland an tling

Cleveland Cavaliers chuan nimin zing NBA regular season inkhelah Miami Heat 112-107 in an hneh a, a thiam zual pariat inelna playoff khel turin an tling fel der - season kal laia tling hmasa ber an ni.

Heat hian point sariha sang zawk chungin quarter lina an khel, mahse quarter hnuhnung berah Cavaliers hian lehthalin, tun hnaiah a zawnin match 12 ngawt an chak ta a, playoff khel tura tlin hi an phu.

Cavs hian season an hmang ṭha takzet - match 62 an khelh tawh zinga 52 tehmeuhah hnehna an chang thei a, regular season bikah match khelh hmabak 20 tehmeuh la awm mah se, pariatna aia hniamah an awm thei tawh lo.

Heat laka point 26 neitu Donovan Mitchell chuan, "Tuna sang taka kan din theih chhan chu kan zavaia kan thawhrimna leh khelh ṭhat vang a ni. Hnehna kan chan zawh chiah pawh hian match danga chak leh châkin kan tuihal nghal zel," a ti.

Cavaliers hian kum 2016 khan NBA nomawi an lo chawi tawh a, a hnu lamah an la champion leh lo - basketball inelna ngaihhlut berah hian a vawi hnih nan champion leh an beisei mek, kawng erawh a la thui dawn hle.

Inkhel dangah Oklahoma City Thunder chuan Memphis Grizzlies 120-103 in an hneh a, anni pawh hian Western Conference aṭanga playoff khel phak hmasa ber ni turin kawng dik an zawh ve bawk a ni.