Inter tana UCL goal khung tam ber Martinez

Lautaro Martinez chu Inter Milan tana European Cup/Champions League goal khung tam ber a ni ta! Argentina international striker hian UCL-ah goal 18 a khung tling ta chiah.

Nilaini zan Champions League last 16 first leg inkhelah, Italian club Inter Milan hian Feyenoord chu 2-0 in an luhchhuah; second leg an khelhna tur hi San Siro a nih dawn avangin Inter hian quarterfinal an luh ngei a rinawm.

Stadion Feijenoord-a inkhelah Inter tan hian Marcus Thuram chuan chawlhlawk hma hretin an goal khatna a khung a, second half-ah Martinez chuan an goal hnihna leh chak nemnghehna ni bawk chu a khung.

Thuram hian mual sir lam aṭanga Denzel Dumfries-a cross luh chu hnai tak tak aṭangin a lo tlawh lut. Kum 27 mi Martinez hian defender pathum hmaa a ball chan chu chiai miah loin goal-ah a thlawh lut bawk a ni.

Inter Milan captain Lautaro Martinez chuan, "Hetiang hun leh dinhmun hi tun hma khan ka suangtuah phak ngai lo. Inter tana UCL goal khung hnem ber ka ni tih ka hriat chiah kha, ka rilruah hlimna nasa tak a lo thleng.

"A bul ka ṭan dante ka ngaihtuah a, hun rei lote chhunga hetiang mellung phun theih chu mimal vang ni loin khelh puite zarah a ni. Inter leh Argentina lama ka chhungte min thlawpna vang pawh a ni," tiin a sawi.

Tun season Champions League khelh laiah Inter chauh hi Serie A team dam awm an ni tawh a, Italian team aiawhtu an ni. UCL bakah hian Serie A hmahruaitu an ni a, an hmelma AC Milan nen Coppa Italia semifinal khelh hmabak an la nei bawk.

Martinez chuan, "Mite chuan Inter Milan chungchang hi an sawi hluai lo a ni mai thei, mahse nakinah chuan kan sulhnute hi an la chhui ang a, kan thlen chin hi a ṭha thei hle a ni. Inter jersey kan ha tawh a nih chuan, a ṭha ber zel kan duh," tiin a sawi.

Inter Milan coach Simone Inzaghi pawhin a naute a chhuang hle tih a sawi a, match khelh tur ngah hle mah se inbuatsaihna hun tlemte an neih chu an hmang ṭha ṭhin hle tih a sawi bawk a, chutihrualin quarterfinal lut chiang an la ni bik lo tih a sawi bawk.

UCL an khelh leh hmain Inter Milan hian Serie A an khel leh phawt dawn, tun kar tawp hian table mawngphaha awm Monza an mikhual dawn a, coach Inzaghi-a'n a duh a nih chuan a player ṭha ṭhenkhat chu hahchawlhna hun a siamsak thei ang.