India hmachhawn tur New Zealand

ICC Champions Trophy semifinal hnuhnung zawkah New Zealand chuan South Africa 50 runs-in an hneh a, Black Caps hian final-ah Australia hnehtu India an hmachhawn ang. Nomawi inchuhna hi March 9, Pathianni chawhnu dar 2:30 hian Dubai-ah khelh a ni ang.

Gaddafi Stadium, Lahore-a inkhelah New Zealand-in bat hmasak thlangin 362/6 runs an siam a, South Africa tan a tam mah mah. Proteas hian over 50-ah 312/9 runs chauh siam theiin Black Caps hi 50 runs-in an chak a, kum 2009 hnua final an thlen leh hmasa ber a ni.

Ravindra show

Nilaini tlai inkhelah New Zealand-in bul an ṭan ṭha a, opener Will Young-a'n 21 runs chauh siam mah se Rachin Ravindra leh Kane Williamson ten danglamna an rawn thlen. Ravindra hian 101 ball-ah 108 runs a rawn siam a, tawnhriat nei ṭha Williamson-a'n 94 ball-ah 102 runs a siam.

Over 33.3-naah Kagiso Radaba-a'n Ravindra vawm hlum mah se New Zealand-in 212/2 runs an siam tling tawh. Over 39.5-naah Williamson-a'n pavilion lam pan ve lehin Black Caps hian 251/3 runs an siam tling a, over 10 khelh tur a la awm.

Daryl Mitchell (49), Glenn Phillips (49*) leh Michael Bracewell (16) ten risk an rawn la a, over 50 a zawh chuan New Zealand-in 362 runs an siam a, chak tur a chiang der tawh.

Proteas lamin theihtawp an chhuah a; captain Temba Bavuma (56), Rassie van der Dussen (69), Aiden Markram (31) leh David Miller (100*) te zarah 312/9 runs an siam a, mualpho lutuk loin chak lo.

New Zealand batter chhuanvawr Ravindra-a'n bowling lamah pawh wicket pawimawh a la a, Aiden Markram vawm hlumtu niin man of the match-ah an thlang.

Engtin zel?

New Zealand captain Mitchell Santner chuan, "Rachin Ravindra leh Kane Williamson ten dinhmun ṭhaah min dah a, rei tak min dam pui avangin a tawp lamah run kan siam tam theih phah. South Africa hi team ṭha tak an ni a, hetiang team kan hneh thei hi kan lawm. Tunah chuan final-a kan hmachhawn tur India lakah kan insawrbing tawh ang," tiin a sawi.

South Africa captain Temba Bavuma chuan, "Pitch kha batter tana vuak nuam ni mah se 350 chunglam target neih kha chu a tam mah mah a, 350 hnuai lamah tal khan dah thei ila a ziaawm deuh ang. Miller kha a khel ṭha viau a, mah se thlawptu a nei tawk lo a ni," tiin a sawi.

Final-a inhmachhawn tur New Zealand leh India hi group match hnuhnung berah khan an inkhel tawh a, Rohit Sharma hote 44 runs-in an chak.