Barcelona an chak hram

La Liga hmahruaitu Barcelona-in Champions League round of 16-ah Benfica an chan avangin vannei tih hlawh mah se, Portuguese club khelmualah hnehna chang turin vanneihna an mamawh - first leg inkhelah 1-0 in an chak hram a, Raphinha chuan inkhela goal awmchhun a khung.

League stage-ah khan club pahnih hi an lo intawng tawh a, Benfica khelmualah vek intawngin goal kua ngawt a lut! Barcelona hi 5-4 in an chak.

Tun ṭumah pawh goal lut tam leh tura rinna a lian a, Barca defensive line sang tak hi Portuguese club hian an ngam riau - Kerem Akturkoglu chuan chance duhawm zet a nei nghal a, mahse, an intawn hmasaka chesual nasa tak, Barca keeper Wojciech Szczesny a chesual duh tawh lo.

Benfica keeper Anatoliy Trubin pawhin hna a nei ve tho a, mahse, Dani Olmo, Robert Lewandowski leh Lamine Yamal te chance neih chu ṭha takin a dansak vek a, Portuguese club an vannei.

Catalan club an vanduai zui - minute 22-naah Barca defender Pau Cubarsí chu hnawhchhuah a ni. Kum 18 mi Cubarsi hian Benfica striker Vangelis Pavlidis chu penalty box pawn hretah a titlu a, red card a hmu.

Benfica-in second half-ah inkhel an thunun zui a, an intawn hmasaka hattrick siamtu Pavlidis vanneih zan a ni lo thung - a match hnuhnung pasariha goal 10 khungtu striker hian uiawm takin a chance neih a thlawh over a, a hnuah Szczesny chuan ṭha zetin a dansak leh bawk.

Barcelona zawkin goal an khung ta nge nge - minute 61-naah Raphinha chuan a khung. Player tam zawk Benfica-in mahni mualah tlawm duh loin Barca na takin an nawr a, mahse, Polish keeper Szczesny 'class' pholanna mai a chang zo - Renato Sanches chance neih a dansakte chu pui tak a ni.

Hetihrual hian kum 34 mi keeper hi a vannei tel ve tho. Minute 82-naah Barca keeper hian Andrea Belotti a titlu a, referee-in penalty spot a kawk nghal.

Mahse, video assistant referee hmanga ennawn a nih hnuah, Italian forward hi a offside a, referee-in penalty a hnuk kir a, Barcelona leh Szczesny an vannei takzet - hun tawp thlengin goal dang a lut lo a, 1-0 in Barcelona an chak.

March 11, Thawhlehni zanah team pahnih an intawng lehnghal dawn a, second leg khelhna tur hi Barca khelmual a nih avangin Catalan club-in quarterfinal luh theih an inbeisei ang.