MFA Cup: Saitual Venglai = Kanan FC

MFA Cup 2025-ah Saitual Venglaiin Aizawl DFA champion leh MPL khel tura inpettling Kanan FC te 3-3 in an inhnehtawk a, Aizawl club hi a suttu zawk an ni. Inkhel dangah MPL khel tur dang Lawngtlai club MLS FC-in Hnahthial club Model FC 3-1 in an hneh.

Chhangphut Field, Champhaia inkhelah Kananin C. Lalthlanawma hmangin goal an khung hma a, Lalthuthlunga hmangin an khung belh. Saitualin Lalbiakthanga hmangin first half-ah siphurh an sut ṭhen. Second half-ah Saitual player hnawhchhuah a ni a, player 10-a an khel chungin Lalremruata hmangin minute 75-naah siphurh an sut zo - goal pahnih hi a ṭha dun hle.

Injury time-ah B. Lalruathlua hmangin Saitualin an khung belh a, chak turah an inngai hman. Kanan an beidawng lo a, Mizo defender ṭha ṭhin Lalpianfela fapa R. Lalruatkima'n box chhungah ṭha zetin a volley goal a, 3-3 in inkhel a tawp.

Vawiinah inelna hi chhunzawm a ni dawn a, group A team parukte an inlan dawn. Inkhel hi CCN Champhai Cable Network youtube channel-ah mumal taka pekchhuah a ni.