A sang zingah Tsitsipas a kir

Mipa tennis thuneitu sang Association of Tennis Professionals (ATP) chuan ranking thar a ti chhuak a, tun hnaia hlawhtlinna chang Stefanos Tsitsipas chu a sang zual 10 zingah a tel ve leh ta, pakuana dinhmun a luah.

Kum 26 mi Tsitsipas hi a tawn san lai ber chuan world number 3 pawh a lo ni tawh, mahse hun rei tak chhung nomawi a chawi loh avangin nikum May thla hnuah khan a sang zual 10 zingah a tel phak lo, kum khat deuh thaw a beih hnuah a kir leh ta a ni.

Dubai Tennis Championship khelh zawh takah khan Tsitsipas hian Felix Auger-Aliassime chu 6-3, 6-3 a hnehin a champion a, tennis a khelh hun chhunga nomawi 12 a lak tlinna a ni chiah a, ATP 500 level bika a hmasa ber a ni thung.

Hmanni lawka Qatar Open champion Andrey Rublev a chefuh reng thei lo. Russian tlangval hi Dubai lamah chuan round of 32 paltlang loin a tla nghal a, ranking lamah hma a sawn leh thei rih lo a ni.

Hremna hmang mek Jannik Sinner chu a chung berah a la awm chhunzawm a, tun hnaiah Indian Wells leh Miami Masters te khelh a ni dawn a, world number 1 Sinner hi a hnuaia awm Alexander Zverev leh Carlos Alcaraz te tan hnaih chilh theihna remchang a ni ang.