Thunder thawm a ring chhunzawm

Shai Gilgeous-Alexander chu Oklahoma City Thunder chakna hnar a ni zel, nimin zing NBA inkhelah Shai Gilgeous-Alexander hian point 51 tehmeuh neiin a team hi Houston Rockets lakah 137-128 in a chakpui.

NBA regular season kal laiah Gilgeous-Alexander hian match khata point 50 a neih tlin vawi lina a ni a, point 40 chin a neih vawi kuana a ni bawk - January hma lam kha chuan hetiang thil hi a la ti thei ngai lo, tun hnaiah nasa takin hma a sawn.

Oklahoma City hi a zawnin match li an chak ta a, an match hnuhnung 15 aṭangin vawi 13 zet chu hnehna an chang bawk. Tun season chhungin vawi 50 an chak tling tawh a, fal takin Western Conference table-ah hma an hruai mek. Anmahni hnaih bertu Los Angeles Lakers chu vawi 38 an chak ve thung a ni.

Nimin zing NBA inkhel dangah Golden State Warriors chuan Charlotte Hornets chu 119-101 in an hneh a, Miami Heat pawhin Washington Wizards chu 106-90 in an hneh ve bawk.

Warriors tan hian Stephen Curry chuan point 21 a neih bakah, point 22 neitu Buddy Hield a langsar bawk - Western Conference table-ah parukna dinhmun luahin, playoff khel turin an dinhmun an siamṭha ta hle.