US-ah Djokovic leh Murray zin dun

Australian Open atan an thawh dun hnuah Novak Djokovic leh Andy Murray te an thawk dun chhunzawm zel dawn a, tunah chuan Indian Wells leh Miami Masters khel turin an zin chhuak.

Kum 37 mik Djokovic hian ATP Masters tournament pahnih hi khelh ve ve a tum a, kum 2019 khan heng inelna pahnihah te hian a zawnin a lo champion tawh a, tunah beiseina a nei leh mek a ni.

Murray hian tennis a chawlhsan hnu lawkah coaching a luhchilh a, kum tira khelh Australian Open-ah khan Djokovic hi a enkawl, hlawhtling nghal chiah lo mah se beisei an nei zui mek.

Grand Slam vawi 24 champion tawh Djokovic chuan, "Eng chena rei nge kan thawhdun dawn tih kan sawi chiang thei lo. Mahse, tuna kan ruahman danah chuan United States bakah clay court tournament ṭhenkhat chu kan hmachhawn dun ang.

"Tournament zawng zawng hi ka tan khelh vek a remchang tawh lo, ka taksa dinhmun ka ngaihtuah tel a ngai bawk. Kei leh ka team tana ṭha ber tur chu a tlachawpin kan ngaihtuah zel ang," tiin a sawi.

Season hmasa khan Djokovic hian major title a la miah lo, kumina an khelh hmasak berah a champion lo bawk. Tennis a khelh hun chhungin nomawi 99 a vaw chhuak tawh a, mellung pawimawh bik phun turin vawi khat champion a la mamawh.