Verona lakah Juventus an chak

Juventus chuan an mikhual Hellas Verona chu 2-0 in an hneh - Thawhṭanni zan Serie A inkhelah hian Old Lady tan Khephren Thuram leh Teun Koopmeiners ten goal an khung a ni.

Champions League leh Coppa Italia aṭangin Juventus an tla a, an boruak ṭhat tawk loh lai tak a ni. Allianz Stadium-ah fans tam takin tun hnaia an result avanga an lawm lohna an lantir a, coach Thiago Motta leh a naute tan chak loh a thiang lo.

Mikhual Hellas Verona midfielder Tomas Suslov chuan yard 30 zeta hla aṭangin goal ropui tak tur a khung, mahse goal luh hma hian Marco David Faraoni chu a lo offside avangin VAR hman a nih hnuah goal hi an sutsak.

Francisco Conceicao, Douglas Luiz, Renato Veiga, Nicola Savona, Gleison Bremer, Juan Cabal leh Arek Milik te nei mah se Juve lamin goal khung an harsat, minute 72-naah Khephren Thuram a inlar chauh.

Thuram hian box sir lam aṭanga Andrea Cambiaso siamsak chu lo pet nghalin chiang takin a lut a, 1-0 in hma an hruai. Hun tawp hma chiahin Teun Koopmeiners chuan defender leh goalkeeper Lorenzo Montipo hman lohin an goal hnihna a khung bawk.

Serie A bikah chuan Juventus hi an match hnuhung pangaah an chak vek a, league match 27 an khelh aṭanga point 52 hmuin table-ah palina an ni mek, an chunga awm Atalanta an phak lohna chu point thum a ni mek.

Juventus manager Thiago Motta chuan, "First half-ah khan goal khung tumin kan nawr na em em a, hun remchang pawh kan insiam hnem. Mahse, kan khung thei tlat si lo, kan khelh dan phung kan tih danglam pawh khan Verona lam kha an danglam ve zel.

"Kan team khelh dan hrechiang leh bel em em kan tum a, goal khung a awlsam lo a ni. Amaherawhchu, ka naute khan chetsual an duh lo, goal khung ngei kha an tum ruh em avangin a tawpah chuan kan duh ang kan sual chhuak ta a ni," a ti.

Coppa Italia aṭanga tlak chungchang sawi zuiin Motta chuan, "Fans an lungawi lo tih kan hria, keimahni ngei pawhin hrehawm kan ti hle. A nihna takah chuan Coppa Italia bikah kha chuan chak phu khawpin kan khel lo.

"Serie A boruak a danglam a, tunah chuan chak duhna thinlung kan nei a, khelmual chhungah kan lantir bawk," tiin a sawi a, a sang thei ang bera season khar tumin theihtawp an chhuah tur thu a sawi tel bawk.

Juventus hian tun kar tawpah Atalanta an mikhual zui dawn, an chak a nih chuan Atalanta hi nih rual theihna remchang an nei dawn a ni.