Ake a chawl rih dawn

Manchester City defender Nathan Ake chu a ke phah hliam zai a ni a, Netherlands international hi hun engemaw chen chu a chawlh a ngai dawn - a chawlh chen tur hi chiang taka tarlan a awm lo.

Kum 30 mi defender hi FA Cup-a Plymouth Argyle nen an inkhelh ṭumin a inlan a, mahse, second half-ah Dutch defender hi lakchhuah a ngai a, Thawhṭanni khan zai a ni zui.

Ake chuan, "Ka tan chuan season hrehawm tak a ni a, mahse, thla engemaw zat min lo tibuai tawhtu ka ke phah hliam chu hlawhtling taka zai a ni. Beiseina sang tak nen hmalam hun ka thlir a, tunah chuan ka chawl hahdamin, ka inenkawl dam leh phawt ang.

"Cityzen-te, kan inhmuh leh thuai ka beisei a, min thlawpnaah lawmthu ka sawi bawk," a ti a, hun harsa a tawh lai pawha hrethiamtu City chhungkaw chungah lawmthu a sawi.

Ake hi tun season-ah hliam vangin a talbuai ngun ve hle a, inelna hrang hrangah match 18 chiah a la khel. Team talbuai Manchester City tan an player inhliam hi rimawi a ni dawn lo.

Chelsea academy chhuak Ake bakah hian City-in tlarhnungah inhliam an nei nual a, FA Cup-ah pawh inlan thei lo John Stones leh Manuel Akanji te chu hliam vangin an chawl mek.