Yamal hian Messi a tluk lo ang - Capello

Italian coach ropui, thawm nei na tak ni ṭhin Fabio Capello chuan Lamine Yamal chungchanga zawhna a chhang a, Italian coach chuan Barcelona forward chuan Lionel Messi thlen chin a thlen phak a rin loh thu a sawi.

Kum 17 mi lek ni chunga Yamal-a sulhnu hi a pui rem rem hle - Spain tan vawi 17 inlan tawhin goal thum a khung a, Euro 2024 nomawi chawiin, Barca tan La Liga leh Spanish Supercup nomawi a chawi tawh bawk.

Tun season-ah Yamal a vul lehzual. Barca tan inelna hrang hrangah match 35 khelin goal 11 a khung a, assist vawi 16 a nei bawk. Amah ang thoa La Masia chhuak Messi nena khaikhin a ni ṭhin pawh a awm lo hran lo.

Mahse, Capello chuan, "Yamal hi naupang mai a la ni a, a team tan a thawhhlawk ṭhin hle. Barca tana a rawn inlan tirh khan, 'New Messi' tih hialin tam takin an sawi.

"Mahse, Messi 'level' chu a ni phak lo. Yamal hi player ṭha tak, hmuhnawm tak leh thiam tak a ni a, top player a ni. Mahse, Messi finna ang a nei ve phak lo a ni," a ti a, Messi anga game thlir thiamna leh result thlak danglam thei khawpa thluak ṭha bik a nei ve loah a ngai.

Barcelona hian season duhawm tak an hmang mek. Tun hnaiah Real Madrid chet sual avangin La Liga hmahruaitu an ni a, Spanish Supercup nomawi an chawi tawh a, Copa del Rey-ah semifinal an lut bawk.

Champions League lamah pawh league stage-a pahnihna ni chungin last 16 an lut a, an vannei lehzel - hmahruaitu Liverpool-in Paris Saint-Germain an hmachhawn dawn laiin Benfica an chang.

Barca hian zanin dar 1:30-ah Benfica hi an lenchilh dawn a, Portuguese club hi mahni muala khel tur an nih avangin zuam sual theih an ni dawn - Barca tan fimkhur a finthlak ber ang.