MFA Cup 2025 an ṭan

MFA hnuaia district 11 inelna MFA Cup 2025 chu nimin khan Chhangphut Field, Champhaiah khelh ṭan a ni a, Champhai player ṭha rual awmna Kanan SC chuan Mamit club FC Bazar 2-0 a hnehin bul an ṭan.

Inelna thlengtu Champhai club Kanan SC captain R. Vanramnghaka'n minute 21-naah a tauh lut a, minute hnih hnuah freekick aṭanga ball vawrhluh chu Vanamnghaka hian a tauh lut leh bawk. Mamit club-in a chhanletna an nei lo.

Group A inkhel dangah Kolasib club Electric Veng FC leh Siaha United FC te goal awm loin an inhnehtawk a, match tawp berah Serchhip club Thangzuala Memo FC-in Lunglei club Chanmari FC 3-1 in an hneh bawk.

Vawiin hian group B team-te an inlan dawn. Chhun dar 12:00-ah Saitual Venglaiin MPL kaithar Kanan FC an hmachhawn dawn a, Aizawl DFA champion team hi coach tawnhriat nei ṭha Chawngthansanga enkawl a ni.

Chawhnu dar 2:30-ah Lawngtlai club MLS FC leh Hnahthial club Model FC te an inkhel dawn. Vanlalpeka enkawl MLS hi MPL Playoff-ah an champion a, season tharah MPL an khel dawn.