Tlai dar 2:30-ah South Africa Vs New Zealand

ICC Champions Trophy semifinal hnuhnung zawk chu vawiin tlai dar 2:30 hian South Africa leh New Zealand ten Gaddafi Stadium, Lahore-ah an khel dawn. Nimin khan India leh Australia ten semifinal hmasa zawk an khel a, result kan hre hman lo.

South Africa hi group stage-ah an che ṭha a, match thumah vawi hnih an chak. Proteas hian Afghanistan leh England an hneh a, Australia nena an inkhel tur erawh ruahsur vangin an khel thei lo. Group A-ah New Zealand hi pahnihna an ni a, inelna thlengtu Pakistan hnehna bul ṭanin Bangladesh an hneh zui a, group match hnuhnung berah India an hneh lo thung.

Proteas lamah hian group match hnuhnung bera 72 runs siamtu Rassie van der Dussen leh 64 runs siamtu Heinrich Klaasen te en bik an sual lo ang. Chutihrualin Black Caps-in opener Rachin Ravindra an kawl a, ani Kane Williamson, Daryl Mitchell leh Tom Latham, Glenn Phillips ten thlawp ṭhat chuan South Africa tan hna a hautak dawn.

South Africa hi ICC hnuai inelna lianah an chesual leh ṭhin. Cricket World Cup-a an thlen san ber chu semifinal a ni a, rin ngam an harsa. Nikum ICC T20 World Cup-ah final an lut a, India an ngam lo. Chutihrualin ICC Champions Trophy-ah erawh champion hmasa ber an ni a, kum 1998 khan nomawi chawiin hemi hnuah final an lut tawh lo.

New Zealand pawh hi inelna lianah an irhfiak ve ṭhin tho a, ICC World Cup leh T20 World Cup-ah an la champion lo. Chutihrualin an khingpui tur South Africa ang thoin Champions Trophy-ah erawh vawi khat an champion tawh a, kum 2000 khan an champion.