A zawnin vawi thum Milan an chak lo
AC Milan an che fuh hleithei lo - tun hnaiah a zawnin match thum ngawt mai an tlawm ta! Pathianni zan Serie A inkhelah Sergio Conceicao naute hi Lazio lakah 2-1 in an tlawm a ni.
San Siro-a inkhelah mikhual Lazio chu team hlauhawm hmasa zawk an ni a, goal pawh an nawr na hle. Minute 28-naah goal kan hmu, Milan goalkeeper Mike Maignan-a'n an lama lut tur a danper chu hnai tak aṭangin Mattia Zaccagni chuan a khung.
Lazio winger Gustav Isaksen a hmuhnawm a, a tlan chakna hmangin Milan tlarhnung a ti buai thei hle - fal taka ball a lakluh tur chu Strahinja Pavlovic chuan lo ti tluin red card a hmuh phah, goal an phurh bakah player pakhatin an tlem.
A tlem zawk an nih hnuah Milan an beidawng duh bik lo - substitute Samuel Chukwueze chuan tauh lutin si phurh a sut, hun tawp hma minute nga awmah team pahnih te 1-1 in an inhnehtawk.
Amaherawhchu, winger Isaksen bawk a hnawksak. Denmark international hian box chhungah ball a chang a, keeper Maignan chuan lo ti tluin penalty a chawi - VAR hmanga endik hnuah pawh pek zui a ni, a pettu Pedro chuan chakna goal a khung.
AC Milan manager Sergio Conceicao chuan, "Player zawng zawngin hun harsa kan tawng mek tih chu an hria, hmalam pan tuma theihtawp chhuah bak chu tih theih dang kan nei rih lo.
"Kan vanduaizia sawi nawn a ngai lo, match ṭhenkhatah hi chuan thutlukna dik tawk lo hi kan tuar ṭhin. Player inzat kan nih laiin kan khel ṭha viau a, kan kim loh hnua kan beih let dan kha a lawmawm hle.
"A tawpah erawh kan duh ang vekin thil a kal thei ta lo. Ni thum dan lek lekah match khelh tur kan nei zel a, inbuatsaihna hun a tlem ṭhin em avangin danglamna thlen hluai a harsa," tiin a sawi.
Pathianni zan inkhel dangah AS Roma chuan Como chu 2-1 in an hneh. Kai thar Como tan hian Lucas Da Cunha chuan goal khung hmasa mah se; second half-ah Roma lamin Alexis Saelemaekers leh Artem Dovbyk te hmangin an chhanglet.
Como coach Cesc Fabregas-a'n bench lamah Dele Alli a dah a, kum hnih hnuah English player hi inkhel tura chhawp chhuah zingah a tel ve leh ta chiah a ni a, khelmualah la lut chiah lo mah se a inkhel thei ve leh dawn hnai tihna a ni.
Claudio Ranieri enkawl Roma hian Serie A match 27 an khelh tawh chinah point 41 hmuin pariatna an ni mek a, season tir lamah kha chuan table mawngphah lama talbuai an ni a, tunah chuan season thara European football khel phak turin beiseina an nei.
Como pawh point 28 hmuin 13-naah an awm, an dinhmun hi ṭha tak ni rih lo mah se season thara Italian football inelna sang ber khelh chhunzawm an beisei ngam ang.