PSV mualah Arsenal

Arsenal chuan Champions League last 16 khel turin zanin dar 1:30 hian PSV Eindhoven an tlawh dawn, coach Mikel Arteta leh a naute tan tun season chhunga an nomawi beisei theih awmchhun ang hial a ni tawh a, thapui chhuah a ngai ang.

Gunners hi hliam vangin an buai hle a, mahse chhuanlam siamin awmzia a nei lo - hliam an ngah avanga ngaihhnathiam ngawt theih an ni bik lo a, chuvangin a chinfel theih dan kawng an zawn zawk a ngai a ni.

Kai Havertz, Bukayo Saka, Gabriel Jesus leh Gabriel Martinelli te tel loin season chawhnu lam an hmang chho mek a, midfielder Mikel Merino chu tlarhma laia an hman te pawh a ngai hial ṭhin.

Arsenal manager Arteta chuan, "Player hliam vanga inkhel thei lo an tam a, kan hmabak hi a thim zawnga thlir duh tan chuan a ipik hle tih pawh ka hria, mahse a chinfel dan kan ngaihtuah a pawimawh zawk.

"Champions League khelh tur kan nei a, inelna lian leh pawimawh tak mai a ni," a ti. Premier League hmahruaitu Liverpool chu umphak theih loh ni lo mah se an inkar a zau tawh a, an tan UCL hi thi leh thau pawlh a beih a ngai.

North London club hian tun hmain UCL nomawi an la chawi ngai lo, champion ngai lohna hmuna champion thut chu a harsa dawn, last 16 an paltlang a nih pawhin Real Madrid leh Atletico Madrid inkhel a chak zawk chu an hmachhawn leh tur a ni ang.

Hliam an neih tam karah Ethan Nwaneri chuan hming a lo chher ve mek thung. Arsenal academy chhuak Nwaneri hi kum 17 mi chauh la ni mah se tlarhma lamah chuan an beiseina siamtu a ni mek a, zainah pawh enbik tur a ni dawn.

Tun hmain Phil Foden leh Jude Bellingham te chuan kum 17 mi chauh ni chungin, football inelna sang UCL knock out stage-ah hian bul an lo ṭan tawh, tunah Nwaneri hian an hnung zui theihna remchang a nei, inkhel bul a ṭan chuang English player zinga hetiang ti thei pathumna a ni ang.

Nwaneri leh Merino te thlawp turin midfielder ho an pawimawh dawn. Declan Rice leh Martin Odegaard te hi an inkawp fuh chuan team lian hneh pui tham an ni, chutihrualin Odegaard hian season hmasa lama a khelh dan a phak rih lo.

Arteta-a'n, "Danglamna thlen thei," tia a sawi tawh Odegaard chungah mawhphurhna a tla lian dawn a, goal a khung lo a nih pawhin goal an khung theihna tura hmun siam emaw, a sual chhuaktu emaw tal a nih a pawimawh ang.