AC Milan an chak lo

Serie A nomawi chu AC Milan tan beisei ngam chi a ni ta lo - Ningani zan inkhelah Milan hi Bologna khelmualah 2-1 in an tlawm a, league table-ah pariatna dinhmun luahtu an ni mek.

Renato Dall'Ara Stadium-a inkhelah Milan tan Rafael Leao chuan chawlhlawk hmain khung mah se, second half-ah Santiago Castro chuan sutin a hnuah Dan Ndoye chuan chakna goal a khung.

AC Milan manager Sergio Conceicao chuan, "Goal kan chhuah hmasak zawk kha en chuan handball a awm ngei tih kan hmu thei, mahse goal atan an pawm ta miau si a, a tawpah danglamna a nih phah.

"Referee kha sawisel ka tum ngawr ngawr a ni hran lo, mahse thutlukna dik lo vanga kan tuar fo erawh a pawi ka ti hle, hetiang thil hi chu thleng fo tawh lo se ka duh, hun leh tha kan hman tam takte a luangral hi a uiawm," a ti.

Portuguese manager Conceicao hian Paulo Fonseca thlakin nikum December thla khan Milan hi a zawm a, tun hmain Porto chu hlawhtlinna a lo chanpui tawh ṭhin, a club thar Milan pawh nomawi eng emaw ber chawi pui ngei a tum thu a sawi bawk.

AC Milan tan Serie A nomawi a hla tawh a, inelna lian Champions League aṭangin an tla tawh bawk. Inter Milan nen Coppa Italia semifinal an la khel dawn, an beisei awmchhun a nih dawn avangin an ṭang na khawp ang.