Zaninah Serie A inkhel pawimawh bik Napoli khelmualah Inter Milan lut dawn
League a nih avangin final a awm lo, mahse zanin dar 10:30-a Napoli leh Inter Milan te inkhel tur hi tun season atan chuan 'Serie A Final' ang hial a chhal theih, inkhel pawimawh bik a ni.
Inter Milan hi champion lai an ni, tun season kal laia hmahruai rei ber erawh Napoli a ni thung - Antonio Conte naute hian tun dinhmunah Inter Milan hi point khatin an phak lo mek, inkhel result hian league hmahruaitu a ti danglam thei dawn.
Diego Armando Maradona Stadium-ah mipui an khat tlat dawn a, tun hnai season hnih chhunga 'Scudetto' la thei an nih avangin team ṭha an ni a, kuminah midang chunga leng lai an nih avang pawhin en a chakawm, Italian football dik tak hmuh theih a beiseiawm a ni.
Team pahnihte hi vawi 177 zet an inkhel tawh, an intawn hmasa ber chu kum 1926 daih tawh kha a ni. Inter Milan hi vawi 81 chakin sulhnu an nei ṭha zawk - Naples club hi vawi 52 chak ve tawhin, ṭum 44 chu an inhnehtawk thung.
Conte a fimkhur
An khingpui tur chungchang sawiin Napoli manager Antonio Conte chuan, "Inter Milan hi engti kawng zawng mahin an dah hniam theih loh, season hmasa mai khan Serie A nomawi an chawi, chumai bakah Champions League final an khelhna kha a la rei lo.
"Player an nei ṭha a, coach ṭha takin a enkawl an ni bawk. Khawi laiah pawh na takin min bei thei a ni tih kan hriat a ngai, chutiahrualin team ṭha ni tur chuan kan elpui ṭha dangte kan hneh theih a ngai, kawng kan zawng tur a ni," tiin a sawi.
Conte hian tun hmain Inter Milan hi a enkawl tawh a, chutih lai chuan Romelu Lukaku a enkawl - tunah Belgian striker nen hian Napoli an dinthar leh mek a ni a, an club hlui beihna tur lai an hre ṭha ngeiin a rinawm.
Thlasik bazar lai khan Napoli hian an winger Khvicha Kvaratskhelia chu Paris Saint Germain lakah an chan a, Georgia international hi a hmunruak hnawhkhah a harsa, tun hnaiah erawh an insiamrem chho niin a lang.
Inter an ṭha
Italian team lian leh khawng an ni a, league champion an nih piah lamah European football inelna sang Champions League thlengin Italian football chawi nungtu pawimawh an ni a, inrintawkna pawh an nei sang hle.
Inter Milan manager Simone Inzaghi chuan, "Season tirah kha chuan Napoli hi miti rinkai an ni lo mai thei, mahse coach ṭha Conte-a'n a enkawl a, an tih tur chin an thlir fel em em tih ka hria, hetiang team hmachhawn hi chu a awlsam lo.
"Kan tan chuan inkhel pawimawh bik tak mai a ni dawn, ka naute pawh an theihna sang leh ṭha ber hlan turin ka beisei," a ti a, tihsual neih chu a pawi thui zual thei dawn tih a sawi bawk a ni.
Inter Milan hian Hakan Calhanoglu leh Nicolo Barella te an inkawp tir leh a rinawm a, an khingpui tur lamin Scott McTominay an nei thung, midfield hi team pahnihte na taka an inbeihna tur a nih ngei pawh a rinawm.