Antony telna Betis-in Real mikhual dawn

Premier League-ah champion a chiang thawthang tawh a, La Liga erawh a la ngaihnawm dawn chauh - Real Madrid, Atletico Madrid leh Barcelona ten champion an la beisei vek a, kartawpah an inlan vek dawn.

Real Madrid hian zanin dar 11:00-ah Antony telna Real Betis an lenchilh dawn a, Manchester United duh loh Antony hian Spanish football-ah hming a chher thar avangin he inkhel tur hian ngaihven a hlawh hle.

Zanin dar 1:30-ah Atletico Madrid chuan Athletic Bilbao an mikhual dawn a, an elpui club pahnih result hre sain Pathianni zan dar 8:45-ah Barcelona an inlan ve leh ang.

Catalan club hian table chung ber luah mah se pahnihna Real nen an point hmuh zat a inang a, pathumna Atletico aia an sanna pawh point khat chauh a ni - inkhel pakhat result-in La Liga table a la sawi danglam dawrh thei.

Antony telna

Getafe lakah red card hmu mah se, thuneitu lama dilna an thlen hnuin Antony hremna hlih a ni a, zaninah Real a hmachhawn thei dawn. United aṭanga loan-a hawh player hian Betis-ah a theihna a pholang a, ngaihven a hlawh thar hle.

Brazilian forward hian Betis tan match ruk a khelhah goal nga a thawk chhuak tawh a, goal thum khungin, assist vawi hnih a nei - zaninah Real laka goal a khung thei a nih ngat chuan a boruak a sosang lehzual dawn.

Betis hi team ṭha pangngai tak an ni sa hrim hrim. Antony bakah hian Isco an nei. Kum 32 mi attacking midfielder hian Real tan league nomawi pathum bakah Champions League (5) a lo chawi tawh a, tun season-a match 14 a khelhah goal nga leh assist vawi hnih a nei tawh - a club hlui lakah hming chher a châk ang.

Hetihrual hian Spanish attacking midfielder Pablo Fornals, Arsenal full back hlui Hector Bellerin leh Portugal midfielder William Carvalho te hliam vangin an inlan thei dawn lo a, Argentina international Giovani Lo Celso dinhmun a chiang lo bawk.

Real an ṭha

Betis khelmuala leng tur an nih avangin Real tan chetsual theih a ni a, hemi hrechiangtu coach Carlo Ancelotti-a'n Copa del Rey semifinal first leg-a Real Sociedad an hmachhawnna inkhelah player ṭha ṭhenkhat a chawlh hahdamtir.

Sociedad laka ha na vanga inlan thei lo Kylian Mbappe chu inlan thei leh tawh tura beisei a ni a, tlarhmaah Vinicius Jr leh Rodrygo te nen an inkawp leh a nih chuan Betis tan dan an awlsam dawn lo.

Hetihlai hian hrem vangin Jude Bellingham a inlan thei dawn lo a, English midfielder tel lo tur hi Real tan chanchin lawmawm lo a ni. Uruguayan midfielder Federico Valverde pawh a hliam a la dam chiang lo a, Dani Ceballos chu thla hnih vel a chawlh a ngai dawn bawk!

Betis-in player inhliam nei ve nual mah se, an tan chuan tun hi Real hmachhawn hun tak tia sawi theih a ni a, an lo hneh a nih ngat chuan Barca leh Atletico an lawm khawp ang.