Warriors damna Stephen Curry

Stephen Curry-a'n 3-points vawi 12 tehmeuh a vawm lut a, nimin zing NBA inkhel hmuhnawmah Golden State Warriors chuan an khingpui Orlando Magic chu 121-115 in an hneh.

Kum 36 mi Curry-a'n a thiam thil a lantir, a kum tam deuh tawh mah se Golden State tana mi hlu bik a la ni reng, point 56 teh meuh neiin tun season kal laiah match khata point a neih tam ber ṭum a ni hial.

American star Curry hian quarter thumna bikah point 22 a nei tling, an khingpui Magic lamin an neih pumpui (21 points) aiin a tam zawk hian a, a zawna vawi nga an chak theih nan a thawh hlawk takzet.

Warriors coach Steve Kerr chuan, "Keimahni lam chauh pawh a ni lo, kan khingpui lam pawh khan khawvela basketball player ropui leh hmuhnawm bik hi a takin min hmuhpui a ni. Tun ṭum atam bik phei chuan engkim a ni ber mai," tiin Curry chungchang a sawi.

Curry hian basketball a khelh hun chhung, match khata 3-points vawi 12 emaw a aia tam emaw neih tlin hi vawi thum a nei tawh, kum 2016 khan New Orleans Pelicans lakah bawi 13 teh meuh a lo nei tawh a ni.