Goa-in semifinal khel dawn

Indian Super League-ah league stage an khel zo hnai a, ISL Cup khel tur a chiang ṭan - FC Goa chuan Ningani zan khan Punjab FC chu 1-0 in an hneh a, pahnihna aia hniama an awm theih tawh loh avangin semifinal an khel dawn chiang.

Goan club tan Carl McHugh chuan minute 45-naah inkhela goal awmchhun a khung a, 1-0 in an chak - Goan club-in semifinal khel tura an dinhmun an tihchian laiin, Punjab tan playoff khelh beiseina a bo ve nghal thung.

Punjab hian season bul an ṭan ṭha viau. Coach thar Panagiotis Dilmperis hoin an league match hmasa pathumah an chak vek a, mahse, hemi hnua an league match 19-ah vawi li chiah an chak - tunah chuan match hnih khelh hmabak la nei chungin playoff beiseina a bo fel der.

Goa erawh beisei phak bakin season an hmang leh ta thung. India coach ni bawk Manolo Marquez enkawlna hnuaiah Goan club hian bul an ṭan chhe takzet a, an match hmasa parukah vawi khat chiah an chak!

Mahse, a hnu match 16-ah vawi 12 an chak thei a, tunah chuan semifinal an khel dawn chiang ta. Manolo hoin ISL nomawi chawi an inbeisei ang - an chet ṭhat nan Ayush Chhetri chu player thawhhlawk zinga mi a ni a, Dinthar tlangval hian Ningani zanah pawh inkhel bul a ṭan.

ISL-ah Mohun Bagan leh FC Goa te chu semifinal khel turin an tling chiang tawh a, Bengaluru leh Jamshedpur ten playoff an khel dawn chiang bawk - NorthEast United, Mumbai City, Odisha, East Bengal leh Kerala Blasters ten playoff khel turin beiseina an la nei vek a, hmun ruak pahnih chiah a awm tawh thung.