I League nomawi inchuh boruak a sang

I League-ah AIFF Disciplinary Committee thutluknain nghawng lian tak a nei a, table a danglam phah. Edmund Lalrindika telna Inter Kashi-in hamṭhatna an chang a, table chung berah awmin champion turin an dinhmun a ṭha. Chutihrualin Inter Kashi hian March 2, Pathianni zan dar 7:00-a Real Kashmir an mikhual dawn a, an chak lo a nih chuan an dinhmun a derthawng lehnghal thei thung.

Inter Kashi hnaih bertu Churchill Brothers-in vawiin tlai dar 4:30 hian Rajasthan FC an hmachhawn dawn a, I League nomawi inchuh boruak a sang hle. Goan club hian Aizawl FC laka foreigner an hman tam avangin chak loa puan an ni a, chutihrualin inkhelah 1-1 a an inhnehtawk avangin an point hloh zat hi point khat anga chhal theih a ni.

I League khelh mekah Inter Kashi, Churchill Brothers, Real Kashmir leh Gokulam Kerala bakah Rajasthan United thlengin champion beisei thei an la ni a, inelna boruak a nung ṭha hle. Tla tur pawh hriatthiam a la har a, table mawngphaha awm Delhi FC tan pawh I League khelh zel beiseina a la awm a, chutihrualin Pathianni tlaia Dempo an hneh erawh a pawimawh ang.