Cricket hmunhma sak mek enfiah

Cricket Association of Mizoram Apex Council Member te leh, BCCI Councillor Mamon Majumdar te chuan, Ningani khan Suaka Cricket Ground, Sihhmui-a BCCI-in indoor training facility leh club house/pavillion building sak mek an tlawh.

Indoor training facility hi floor hnih tur a ni a, a hnuai lamah hian office, gymnasium, open shower leh swimming pool te awm tura duan a ni, a chung floor-ah hian indoor practice pitch awm tura ruahman a ni bawk. A hna hi kumin June thla-a zo ngei ngei tura tih a ni a, July thla-a hawn hman tura tih a ni. CAM thu chhuah tarlan dan chuan prime minister Narendra Modi-a'n a hawn theih beisei a ni.

Club house/pavillion pawh tlawh nghal niin, hemiah hian home and away dressing room awmin, reception, physiotherapy room, first aid room, media room, umpire room, VIP room, office, kitchen, dining hall etc leh room 37 awmin AC vek tur a nih bakah lift pahnih awm tura ruahman a ni, a building hi ground floor bakah floor thum tura ruahman a ni a, an work programme aṭang chuan kum 2026 January-ah zawh hman tur a ni.