Leicester tan tlak a hnai

Championship nomawi chawi a, Premier League khel tura inpetkai Leicester City tan tlak a hnai leh tawh - Ningani zan khan West Ham chu khualmualah 2-0 in an hneh lo a, league match li a zawnin an tlawm leh ta!

Hammers tan Tomas Soucek chuan a kum 30 tlin lawm nan goal hmahruai a khung a, Jarrod Bowen-a shot chuan Leicester defender Jannik Vestergaard perin goal-ah a lut bawk a, Foxes-in a chhanletna tur an neih loh avangin 2-0 in an tlawm.

Leicester tan inkhel ṭantir lamah Wilfred Ndidi chuan chance duhawm nei mah se, a chhawr lo a, veteran striker Jamie Vardy pawhin uiawm takin woodwork a tauh per bawk - hetihlai hi 1-0 a an hnufual lai a ni a, lut ngat se, inkhel thawnthu a thlak danglam thei hial ang.

Football khawvel barakhaih a, Premier League nomawi hial lo chawi tawh Foxes hian tun season-a league match 27 an khelh tawhah vawi li chiah hnehna an la chang ve a, vawi nga an khingpui inhnehtawkpuiin, vawi 18 an tlawm tawh!

Table-ah 19-na an ni mek a, a him china awm Wolverhampton Wanderers aia an hniamna chu point nga a ni - match 11 khelh tur a la awm avangin thawnthu a la inher danglam thei a, chumi tur chuan coach Ruud van Nistelrooy-a'n a tawrh a ngai thei thung.

Foxes hian Steve Cooper hoin season bul an ṭan a, mahse, an beisei ang result an neih loh avangin November 24 khan Nottingham Forest coach hlui hi an ban.

Cooper-a hnuaiah Leicester hian league match 12 khel hmanin, vawi hnih chiah an chak a, vawi li draw neiin, vawi ruk an tlawm thung. Coach lailawk Ben Dawson hoin match khat an khel a, an tlawm.

Manchester United legend Nistelrooy an la lut a, Dutch coach hian league match 14 kaihruai tawhin, vawi hnih chiah a la chakpui a, vawi khat draw an nei - vawi 11 an tlawm tawh tihna a ni a, Steve Cooper aiin a record a chhe zawk fe tihna a ni. Season tawp hmaa a puanthuah tel a ṭul a nih pawhin a mak lo ang.