David-a'n Mizoram tan gold medal la

13th National Para Judo Championship 2025-ah Mizoram tan mitdel David Lalremruata chuan gold medal a hlawh chhuak - West Serzawl tlangval David-a hi Mizoram aiawha he inelna tel hmasa ber a ni a, a vawi khat telnaah gold medal nen a lo haw thei.

Judo hmanga inelna hi February 24-28 inkar khan Lucknow khawpuiah neih a ni a, David-a hi blind category, below 81kg (J1)-ah inlanin, a khingpuite 'ippon' (knockout) hmangin a hneh vek - a record hi a ropui rem rem hle.

David-a hi inelnaah hian a tel vawi khatna a nih avangin beiseina tihsan ngam a ni lo a, Mizoramah inzirna leh hmunhma a la ṭhat tawk loh vang a ni tel bawk. Mahse, David-a'n kut ruaka lo haw a tum lo a, final-a a hmachhawn Odisha mi Bhagwan Nayak chu hnehin gold medal a hlawh chhuak.

David-a inlanna category hi senior category niin, tun inelnaa player tel an tamna ber a ni a, mi pakua ngawt an inlan.

West Serzawl tlangval hian final-a a hmachawn Nayak aiin bout khatin a khel tam zawk a, gold medal hlawh chhuak turin mi pali ngawt a hneh.

David hi a coach chu Madhu Chhetri niin, team manager Jerry Lalramenga, Durtlang chuan inelnaah hruaiin a telpui.

Ruahman dan chuan March 2, Pathianni hian Delhi aṭangin an lo haw dawn a, Mizoram Judo Association chuan an player chhuanvawr hi ropui taka lo hmuah an tum a ni.