Player 10-a khel United an chak

Manchester United-in Old Trafford-ah bul ṭan ṭha lo mah se a tawp an khar ṭha a, Nilaini zan Premier League inkhelah player 10-a khel chungin Ipswich Town 3-2 in an hneh. Chakna goal khungtu chu FA Cup-a Leicester City laka chakna goal khungtu Harry Maguire bawk a ni.

Thlasik bazara lakluh Patrick Dorgu tan mangchhia a ni a, minute lina lekah ball vawrhluh satliah chu Dorgu-a'n goalkeeper pass a tum a, Andre Onana rawn tlanchhuah hman si avangin Jaden Philogene-a'n goal ruakah a khung.

Mahse, United-in siphurh an sut vat. Minute 22-naah Bruno Fernandes-a freekick chu Ipswich midfielder Sam Morsy-a'n an lamah a tauh lut. Minute 26-naah Bruno Fernandes-a corner pet chu Ipswich lamin an clear thei lo a, Diogo Dalot-a'n goal-ah petin goalkeeper Alex Palmer-a'n dang mah se a per chu Matthijs de Ligt-a'n goal ruak a khung.

Inkhelh ṭantirh chiaha chesual, Dorgu a chesual nawn. Dorgu hian Omari Hutchinson a tlawh a, minute 43-naah VAR aṭanga ennawn hnuah hnawhchhuah a ni a, fimkhur loh vang a ni.

Player 10-a an khelh ṭul avangin Ruben Amorim-a'n Alejandro Garnacho la chhuakin Noussair Mazraoui a dahlut a, half time a nghak thleng thei tawh lo. Argentine winger hian lungawi loh vangin dressing room a pan nghal.

Goal venhim tumin United tlarhnung dah belh mah se injury time-ah Axel Tuanzebe cross chu Philogene-a'n a khung a, halftime-ah 2-2 a ni tho - Amorim-a'n substitution siam a hlawhchham. Mahse, Man United hian second half an ṭan ṭha a, minute 47-naah Fernandes-a corner pet chu Maguire-a'n a tauh lut.

Amorim-a hote an chesual nawn tawh lo a, hun chanve chhung player 10-a khel chungin goal an venghim thei a, second half-a an khelh danah an lawm ang. Chutihrualin inkhelh banah sawi zui erawh Garnacho chet dan a ni a, second half-ah Old Trafford-ah a la awm em tih hriat a ni lo.

Man United manager Amorim chuan, "Garnacho hi ka biak a ṭul," tiin inkhelh banah a sawi. December thla Manchester Derby-ah Garnacho leh Marcus Rashford te a tel lo a, training-na an nungchang vangin a hrem. Rashford hrem zui a nih laiin Garnacho erawh first team zingah a tel vat thung.

Portuguese manager Amorim chuan, "Rashford nena sawi zawm intum. Thil inang lo a ni a, chutihrualin boruak ṭha lo lam ve ve a ni. Tuna mi bika kha tactical change a ni a, 5-3-1 a ka khelhtir theih nan player ka thlak. Player pakhat lakchhuah a ngai a, thutlukna ka siam a ṭul," tiin a insawifiah. Man United hian March 2, Pathianni zan hian Fulham nen Old Trafford-ah FA Cup 5th round an khel ang.