Frankfurt tan Bayern an ṭha mah mah

Bayern Munich-in Bundesliga nomawi chawi turin kawng dik an zawh zel a, a sang pathuma tel pha Eintracht Frankfurt chu 4-0 in an sawp. Bavarians tan hian Michael Olise, Hiroki Ito, Jamal Musiala leh Serge Gnabry ten goal khat ṭheuh an khung.

Allianz Arena-a inkhelah goal hmuh tur a awm lawk lo. Frankfurt-in Omar Marmoush nei tawh lo mah se Bavarians tlarhnung an tibuai pha tho. Bayern tan Thomas Muller leh Musiala ten chance ṭha an hlah hnuin first half injury time-ah Olise-a'n Sane ball siam chu chiang takin a khung.

Second half-ah Japanese defender Hiroki Ito-a'n box chhungah ball per chang fuhin minute 61-naah goal hnihna a khung. Sane vanneih zan a ni lo a, German winger hian keeper chiah a hmachhawn hnuah a pet out.

Minute 83-naah Musiala-a'n goal ropui a khung a, halfway line thlen hma aṭanga ball khalh ṭanin box chhung thleng a khalh lut a, box chhungah tlu mah se tho lehin ball chu pet theih tura siamin goal-ah chiang zetin a pet lut.

Injury time-ah Serge Gnabry-a'n a khung belh a, Bayern 4-0 in an chak. Vincent Kompany hote hian match 23 aṭangin point 50 an hmu a, Bayer Leverkusen aiin point riatin an hmu tam zawk.