Cattermole-a'n contract pawtsei

Sunderland midfielder Lee Cattermole chuan nakkuma a contract tawp mai tawh tur chu kum nga chhung atan pawtseiin kum 2021 thleng a cham chhunzawm ang.

Kum 27-a upa mid­fielder hian Stadium of Light-ah kum khat bak contarct a neih tawh loh avangin a chuak dawn tih thawm pawh a lo awm hman tawh. Mahse Ningani khan an manager Dick Advocaat nen inhmuin inremna hi an siam fel thei a ni.

Dutch manager Advo­caat chuan, "Lee hi kan tan chuan player pawimawh leh kan innghahna ber pakhat a ni. Midangte rilru hneh turin theihna a neih avangin kan hnena hun rei zawk a cham thei tur hi kan lawm takzet," tiin a player duhlai chung­chang a sawi.

England Under-21 player hlui hian kum 2009 khan Wigan Athletic

aṭangin pound maktaduai rukin Sunderland hi a zawm a, a club tan hian match 148 a khel tawh. Kum 2013-14 season khan League Cup final a thlenpui hial, mahse final-ah Manchester City lakah 3-1 in an tlawm thung.

Season hmasa khan Premier League-ah a Black Cats hi point 38 hmuh puiin table-ah 16 na an ni a, season thara Premier League khel chhunzawm turin an in ham tang hram.