Atalanta pet chhuaktu Club Brugge

Rawlthar Chemsdine Talbi-a goal hnih hmangin Club Brugge chuan Atalanta 3-1 in an hneh a, an inkhelh tawhna hmasa nen belhkhawmah Belgian club hian 5-2 a hnehna changin Champions League last 16 an lut.

Gewiss Stadium-a inkhelah Club Brugge tan Chemsdine Talbi-a'n minute thumna lekah goal a khung ṭan a, chawlhlawk hmain goal khat dang a khung bakah Ferran Jutgla chuan a khung belh.

Second half tirah Atalanta beiseina siam thar turin Ademola Lookman chuan goal khat a khung ve a, mahse a tawp thlenga goal dang an khung belh theih loh avangin Italian club zinkawng a tawp.

Atalanta manager Gian Piero Gasperini chuan, "Champions League hi chu vawi hnih inkhelh a ni a, ṭum khata tih fuh hluai ringawt kha a tawk ṭhin lo, chuvangin Club Brugge khan hnehna chan an phu zawk.

"Goal kan chhuah hma lutuk khan nghawng a nei na hle, loh theih lohin goal khung tuma kan nawr let a ngai tawh si a, khami kar awl kha anni lamin an rawn hmang ṭangkai ta zel a ni," tiin a sawi.

Italian football tan chuan Thawhlehni zan kha zan duhawm lo a ni - Atalanta bakah hian AC Milan chu team nem zawka ngaih Feyenoord hneh loin an zinkawng a lo tawp ve bawk.

Club Brugge coach Nicky Hayen chuan, "Last 16 kan lut hi mak ka ti lo, a chhan chu first leg aṭang khan ka naute hi chakna chan duhin an tuihal a, an theihna zawng zawng an hlan tih ka hmuh khan an lakah beisei pawh ka nei sang a ni," tiin a sawi.