Bayern-in Leverkusen an chelh

Bundesliga-ah Bayern Munich-in champion lai Bayer Leverkusen hmachhawn turin Bay Arena-ah an lenglut a, 0-0 in an inhnehtawk. Vincent Kompany hote hian an elpui Xabi Alonso hote laka point khat hlu tak an hlawhchhuah avangin champion-na kawng a inhawng zau sawt.

Bayern hian match 22 aṭangin point 55 an hmu a, point 47 hmu tawhtu Leverkusen aiin point riatin an hmu sang zawk. Bundesliga-ah hian club 18 chauh an awm avangin season khatah match 34 an khel a, match 12 chauh khelh tur a awm tawh avangin Harry Kane pawhin nomawi a chawi ngei dawn niin a lang.

Leverkusen an chungnung

Leverkusen-in nomawi humhim turin an elpui Bayern an hneh a ṭul a, Xabi Alonso hote an tumah an chiang. Bay Arena-ah attacking football an khel a, Leverkusen-in an nawr miau avangin Harry Kane aiin Manuel Neuer a langsar zawk.

Mualneitu an hmuhnawm a, Florian Wirtz-a'n minute 21-naha Bayern defender Dayot Upamecano bumin a cross/shot chu Neuer-a'n a dang a, hemi per hi Jeremie Frimpong-a'n crossbar tauh per nan a hmang.

Leverkusen-in an nawr chhunzawm zel a, left back Piero Hincapie cross chu Nathan Tella-a'n crossbar pet per nan a hmang. Bayern-in chance an nei ve meuh lo a, Leverkusen-in Kane leh a ṭhiante an dah ṭha.

Second half-ah pawh Leverkusen-in an nawr chhunzawm a, minute 67-naah Alejandro Grimaldo corner pet chu Jonathan Tah-a'n hmun hlauhawm laiah tauh letin Tella-a'n goal zawnah tauh mah se goalline aṭangin Bayern left back Hiroki Ito-a'n a tauh chhuak.

Bayern-in Leverkusen lakah risk la loin point khatah an lungawi a, goal venhim hna an thawk chhunzawm zel. Goal hmaah Wirtz a vannei tawk lo a, hun tawp thlengin goal khung theihna tur an nei. Injury time-ah Grimaldo cross chu substitute Amine Adli-a'n goal-ah pet mah se Neuer-a'n a dang ṭha takzet. Hemi per changtu Wirtz-a'n ṭha takin chance insiam leh mah se goal pawnah chiah a pet a, Bayern an vannei - goal awm loin inkhel an tawp.

Engtin zel?

Bayern-in goal attempt ṭum hnih chiah an insiam a, kum 33 chhunga chance an insiam tlem ber a ni. An goal chance pahnih hian Leverkusen goalkeeper Lukas Hradecky a tibuai lo ve ve bawk. Leverkusen erawhin 55% ball possession an nei a, Bayern meuh hmachhawn mah se shot vawi 16 zet an nei thei a ni.

Inkhelh banah Leverkusen manager Xabi Alonso chuan, "Chak tumin kan theihna leh thiamna zawng zawng kan chhuah. Mahse, a tawp dawnah kan ti dik tawk lo a, goal kan khung thei lo. Crossbar vawi hnih kan tih per a, goal khung theihna hun ṭha kan ngah hle. Kan khelh dan erawh a ṭha thlawt a, ball tel leh tel loin kan ti ṭha ve ve," tiin an khelh danah a lungawi a, goal hmaa an hriam tawk lo erawh pawi a ti thung.

Bayern manager Vincent Kompany chuan, "Kan khelh ṭhat ber ṭum a ni lo a, mahse thahrui kan ngah thung. Dik takin han sawi ila, kan tih tur tak kan ti. Point riatin kan sang a, match khelh tur ṭhahnem tak a la awm bawk. Tunah chuan kan inkhelh leh tur kan thlir a ṭul tawh," tiin a sawi.

Bavarians hian February 18, Thawhlehni zan hian Celtic an mikhual an dawn a, khualmualah 2-1 a an hneh tawh avangin Champions League last 16 lut turin an dinhmun a ṭha.