Quarterfinal-ah Swiatek a lut

Qatar Open champion lai Iga Swiatek chuan nimin zing khan Linda Noskova a hneh a, fiahna paltlangin quarterfinal a inhlangkai - nomawi a kawl lai humhim turin kawng dik a zawh zel a ni.

Polish nula Swiatek hi tun dinhmunah world number 2 a ni a, tun ṭumah pawh hian seeded pahnihna a ni, a khingpui Czech Republic nula hi 6-7 (1), 6-4, 6-4 in a hneh a, hun rei tak hnuah Qatar Open bikah set a hloh ve chiah.

Kum 23 mi Swiatek chuan, "Duhthusam ang thlapa khelh vek theih chu a ni lo, a pumpui thlir chuan ka khel ṭha thawkhat hle chuan ka hre thung, match lehpekah chuan ṭha lehzual zawka khelh a ngai ang," tiin a sawi.

Quarterfinal-ah chuan Swiatek hian Elena Rybakina a hmachhawn leh ang, inkhel dangah Rybakina hian Rebecca Sramkova chu 7-6 (1), 6-2 in a lo hneh ve thung, semifinal luh inchuh inkhel hi a hmuhnawm dawn.

Jessica Pegula pawhin quarterfinal a lut, seeded parukna Pegula hian Daria Kasatkina lakah 6-3, 7-5 in hnehna a chang a, a hma a ding leh tur chu Ekaterina Alexandrova a ni. Ani hian Elise Mertens 6-4, 6-2 in a hneh ve thung.

Qatar Open khelh laiah hian world number 1 Aryna Sabalenka leh number 3 Coco Gauff te chu second round paltlang zo loin an lo tla tawh a, kum bul ṭan fuh tawk lo Swiatek tan insiamrem theihna remchang ṭha bik a ni ngei ang.