Monaco lakah Benfica chungnung

Benfica chuan Champions League last 16 lut turin kawng dik an zawh - Portuguese club hian an mikhualna ramah Monaco hi 1-0 in an hneh a, goal awmchhun hi striker Vangelis Pavlidis khung a ni.

Thawhlehni zan Stade Louis II-a inkhelah goal kan hmu mai lo, second half ṭan aṭanga minute thumnaah Benfica hmatawng Pavlidis-a'n a khung, amah vengtu defender a nek sawn hnuah goalkeeper Radoslaw Majecki chu mawi takin a chip khum.

Goal an chhuah hnu lawkah Monaco an chesual zui, midfielder Moatasem al-Musrati chuan yellow card pahnihna hmuin hnawhchhuah a ni a, player kim loa an awm hnuah an tho chhuak thei tawh lo.

Monaco coach Adi Hutter chuan, "A kim lo zawk nih chuan thil a harsa, kan tan chuan hremna na tak a ni," tiin Moatasem al-Musrati an hnawhchhuah chungchang a sawi a, second leg a la awm avangin an beidawng lo tih a sawi bawk.

Hutter chuan sawi zawmin, "Inkhelh banah khan ka naute ka bia a, match a la zo lo tih ka hrilh. Lisbon-ah chuan a hautak tawh dawn tih kan hria, a hautak dawn avanga zam tur erawh kan ni lo," a ti.

February 18, Thawhlehni zanah Monaco hian Benfica hi an lenchilh zui ve leh ang. Ligue 1 club tan goal khung ngei ngei a ngai dawn a, an chhuah belh a nih chuan sut zawh a harsa tawh ang.

Benfica coach Bruno Lage chuan, "League phase kan khelh lai khan Monaco khelmual hi kan lo tlawh tawh a, thil thlen dan vel hriatthiam pawh a harsa ṭhin hle. Min beih dan tur lo inchhut lawk a harsa ṭhin.

"Chutihrualin ka naute an inveng thiam em em a, mamawh hunah tak goal pawimawh kan khung thei bawk. Inkhel a la zo lo tih erawh kan hria, tun aia ṭha zawkin mikhual dawnsawn kan tum ang," a ti.

Team pahnih ten second leg an khelh hmain league match khelh tur an nei ve ve a, anmahni awmna league an ngaih pawimawh tel a ngaih bawk avangin player siksawi pawh an thiam a ngai ang.