Aizawl FC elpui Bengaluru-in point an hmu

Nimin I League inkhelah SC Bengaluru-in an mualah Rajasthan United mikhualin 2-2 in an inhnehtawk a, Aizawl FC dinhmun a chhe leh hret. Bengaluru hian point 13 an hmu a, Delhi FC leh Aizawl FC aiin point thumin an hmu sang zawk.

I League aṭangin team pahnih relegate tur a ni a, match 14 khelh chinah Delhi FC leh Aizawl FC te chu table hnuai lam pahnihah an awm. Inelnaah team 12 an awm a, match 22 khelh tur awmin match riat khelh tur a la awm a ni.

Bangalore Football Stadium-a inkhelah Rajasthan-in corner kick hmang ṭangkaiin first half-ah Ronaldo Johnson hmangin an khung. Minute 61-naah mualneituin Aizawl FC tan pawha khel tawh Henry Kisekka hmangin siphurh an sut a, minute hnih hnuah Kishan Singh Chongtham-a'n khung lehnghalin, 2-1 a ni ta daih. Mahse, Rajasthan-in substitute Uruguayan forward Maicol Cabrera hmangin siphurh an sut a, 2-2 in inkhel a tawp.

Aizawl FC hian February 17, Thawhṭanni zan dar 7:00-ah Churchill Brothers an mikhual dawn. Mizo club hian khualmualah Goan club hi 6-0 zetin an hneh lo a, RG Stadium-ah phuba lak an tum ang.