Milan hna a hautak dawn

AC Milan chuan Champions League last 16 lut tur chuan Feyenoord an lehthal a ngai dawn - playoff first leg inkhelah Milan hi 1-0 in an chak lo; February 18, Thawhlehni zan hian San Siro-ah second leg an khel leh ang.

Thawhlehni zan khan Stadion Feijenoord-ah first leg khelh niin, inkhel ṭan aṭanga minute thumna lekah Feyenoord tan Igor Paixao chuan goal awmchhun a khung a, mikhual team lamin a chhanletna tur an nei lo.

Brazilian forward Igor Paixao hian an goal hnihna tur pawh a khung teuh hle, mahse mawi tak maia a pet kum chu lut ngei tur angin lang mah se goal bar a per a, Milan an vanneih phah hlauh.

Milan tana inkhel bul ṭantu zingah Italian player an awm miah lo a, sawi zui a hlawh. Christian Pulisic, Rafael Leao, Santiago Gimenez leh Joao Felix te remchang nei mah se an hlawhtling thei lo vek.

AC Milan manager Sergio Conceicao chuan, "Hnehna chang tur hian ball kang lak theih te, leia ball awm uma chan tam te leh theihtawp chhuah te a ngai, hengte hi Feyenoord lam khan an nei a, tun ṭumah chuan hnehna chan phu zawk an ni.

"Tho chhuak leh tur chuan kan thawhrim a ngai a, tun ai khan goal kan nawr nat a ngai bawk. Champions League a nih chuan a boruak a danglam, he boruak danglam hian min ti phur tur a ni a, zam phah tur a ni lo.

"Ṭha lehzual zawka khel tur chuan kan zavaia hmasawn a ngai, keimah hi a bul ṭanna tur chu ka ni ang. Kan khelmualah kan khel ve thung tawh dawn a, min ṭantute hmaah chuan boruak a danglam ngei ka beisei," tiin a sawi.