Havertz tan season a tawp

Arsenal forward Kai Havertz chu training laiin a hliam a, a malpui hliam vang hian tun season chhung chu a inkhel thei dawn tawh lo niin khawthlang chanchinbu te chuan an tarlang.

Germany international Havertz hian season kal laiah goal 15 a khung tawh - Arsenal player zinga khung tam ber a ni. Gunners hian Dubai-ah training an nei zawk a, an training laiin Havertz hi a inhliam a ni.

Thawhlehni khan Arsenal hi London khawpuiah an kir a, an forward Havertz hliam hi endik a ni ang a, club lam chuan a chawlh chen tur hi chiang takin an la sawi rih lo thung.

Mikel Arteta tan chuan Havertz inhliam hi lu ti hai tham tur tak a ni ang, a hmain forward ṭha Bukayo Saka leh Gabriel Jesus te an hliam tawh a, anni bakah hian Gabriel Martinelli chu a lo hliam tawh bawk.

Premier League beisei mektu Arsenal hian tlarhma lama chhawr tur an nei tlem ta hle, tawnhriat nei ṭha zingah Leandro Trossard chu an neih ṭhat a ni dawn, loan hmanga an hawh Raheem Sterling an hman a ngai bawk ang.

Gunners hian Inrinni zanah Leicester City an lenchilh dawn - tun thla chhungin West Ham leh Nottingham Forest te an la hmachhawn dawn; March thla tirah Manchester United an lenchilh dawn a ni.