AFC-in Nigerian midfielder ziak lut

Aizawl FC-in nimin khan MFA registration committee hnuaiah Eniwo Onome Benjamin an ziak lut a, Nigerian midfielder hian visa fel loh vangin India ram a la pan thei lo.

Nimin lama AFC-in Eniwo Onome an ziahluh chhan hi transfer tawp hun a nih vang a ni a, August 31 hnu lama foreigner emaw state pawn player emaw lalut tur chuan loan hman a ṭul tawh ang. Club pakhatin season khatah loan pali chiah an nei a, pahnih hi tualchhung player lak theihna niin pahnih dang leh chu inter state transfer ngai player lak nana hman tur a ni thung.

Aizawl FC technical director Hming-than-sanga chuan, "Benjamin hi an ram Nigerian tan vawi nga koh a ni tawh a, ṭum hnih chu a inlan tawh ang. India rama a vawi khat rawn khelhna tur a ni a, visa pawh a fel theih kan beisei," tiin Vanglaini palai a hrilh.

Kum 22-a upa midfielder chungchang sawi chhunzawmin Hmingthana chuan, "Durand Cup khel tura player 20 kan thehluh zingah Benjamin hi kan telh a, hei vang hian player 19 chiah Delhi-ah kan hruai," tiin inelna neih meka chhawr hman a beisei thu a sawi.

Durand Cup-ah Aizawl FC hi nimin tlai khan Harbaksh Stadium, Delhi-ah Real Kashmir FC hmachhawn tur ni mah se tui a tlin nasat avangin inkhelh hun sawn a ni a, tukin zing dar 9:00 hian Ambedkar Stadium-ah an khel ang.