Lakers tan Luka Doncic a inlan

Basketball player ṭha bik Luka Doncic chuan nimin zing khan Los Angeles Lakers tana a match hmasa ber a khel a, a team thar hi Utah Jazz lakah 132-113 a hnehna chanpuiin bul a ṭan fuh hle.

NBA All-Star vawi nga ni tawh Doncic hi a chawn hliam vangin a chawl deuh reng a, a team thar tan pawh a tirah a inlan thei lo. A inlanna hmasa berah hian minute 24 chhung khelin point 14 a neihsak nghal a ni.

Kum 25 mi Doncic chuan, "Ka luh dawnah khan thawm ring tak ka hria a, min lo lawmtu khatiang zat an awm kha ka tan chuan a lawmawm. Chutihrualin, Lakers tana match hmasa ber a nih vang erawh chuan ka zam ve deuh.

"Basketball court chhunga ka luh chinah erawh buaina ka nei tawh lo a, nuam ti takin ka khel zui a ni. Khatiang taka thlawpna ṭha kha ka dawng nghal ang tih ka beisei phak lo," tiin Lakers tana a match hmasa ber chu nuam a tih thu a sawi.

Slovenian star Luka Doncic hian Dallas Mavericks aṭangin Lakers hi a zawm a, a man atan Lakers player ṭha pakhat Anthony Davis chu a kal tel hial a, tunlai basketball player inthleng kualah chuan thawm nei lian tak an ni hial.

Lakers tan hian rinrawl erawh LeBron James a la ni a, ani hian point 24 neiin Doncic nen an khelh dunna hmasaah a che ṭha a, player pahnih hi an inkawp rem chho a nih chuan NBA champion nih thlengin an sawi ri ngam ang.

Inkhel dangah Nikola Jokic chuan point 40 ngawt a nei a, hei bakah hian assist vawi riat neiin rebound vawi sarih a la bawk a, a team Denver Nuggets chu Portland Trail Blazers lakah 146-117 in a chakpui a ni.

Minnesota Timberwolves tan Anthony Edwards chuan point 44 nei mah se chakpui nan a tawk zo lo thung a, an khingpui Velveland Cavaliers chu Eastern Conference hmahruaitu an nih miau avangin Timberwolves hi 128-107 in an chak lo.

Golden State Warriors erawh an chak - Golden State tan hian Stephen Curry chuan point 38 a nei a, tun season kal laiah match khata a point neih tam ber ṭum niin Warriors hi Milwaukee Bucks lakah 25-111 in a chakpui.