Bayern-in hma an hruai fal

Bundesliga inkhelah Bayern Munich chuan 3-0 ngawtin Werder Bremen an hneh a, Bundesliga table chung ber an luah - Bayer Leverkusen-in 0-0 a Wolfsburg an draw zui avangin avangin league-ah point kua ngawtin hma an hruai fal tawh.

Bayern tan Harry Kane chuan penalty aṭangin goal hnih a khung a, penalty hi Bremen defender Anthony Jung-a chawi ve ve a ni thung - minute 11-naah a shot chu Jung hian a kutin a dang a, penalty a chawi.

Kane-a'n harsatna nei loin goal-ah a chantir a, hun pek belhah Jung hian Jamal Musiala lakah penalty chawi lehin, Kane bawkin goal-ah a chantir.

Harry Kane-a goal khung karah Leroy Sane chuan a khung ve bawk a, Bremen lamin a chhanletna tur an nei thei lo. Bayern Munich an chak a, champion lam an hawi zel.

German club tan Kane-a'n match 57-ah goal 51 a khung ta a, tun season bikah league match 19 khelin goal 21 a khung a, assist vawi riat a nei. Inelna hrang hrangah match 28 khelin goal 28 a khung tawh a, assist vawi 10 a nei bawk - English striker hian Premier League a ngam tluk zetin Bundesliga pawh a ngam.