Copa del Rey - Real Madrid-in semifinal lut hram

Spanish football-a inelna ngaihhlut hlawh, Copa del Rey semifinal-ah Real Madrid an lut - nizan khan quarterfinal-ah Leganés chu 3-2 in an hneh.

Real hian Luka Modric leh Endrick-a goal hmangin 2-0 in hma an hruai a, mahse, Leganes hian Juan Cruz-a goal hnih hmangin an chhanglet.

Mahse, Real tan hun pek belh minute thumnaah Gonzalo Garcia chuan khung ve lehin, 3-2 in an chak daih - Atletico Madrid hnung zuiin semifinal an lut ve leh ta.

Nizan khan Copa del Rey quarterfinal inkhel dangah Real Sociedad chuan Osasuna mikhualin, Valencia khelmualah Barcelona an leng bawk a, he thu buatsaih a nih lai hian result kan hre hman lo.

A kim loin...

Real boss Carlo Ancelotti-a'n Inrinni zanah Madrid derby an hmabak tih a hre ran a, Leganes lakah naupang rual a chhawr - bul ṭantu zingah Vinícius Júnior a tel lo.

Hei chauh a ni lo. Thibaut Courtois, Jude Bellingham leh Kylian Mbappe te chu squad-ah takngial pawh an tel lo a, Ancelotti-a'n kartawpa Madrid derby an khelh tur a ngai pawimawh zawk tih a lang.

Heti chung hian Real hi goal khung hmasa zawkah an ṭang a, minute 18-naah Rodrygo-a pass ṭha tak chu Luka Modric chuan goal-ah a chantir - kum 39 mi midfielder hian Real tana goal khung thei upa ber a nihna chu a chhawm nung zel.

Minute 25-naah Endrick inlar ve lehin, Brazilian rawlthar hian an goal hnihna a khung - kum 18 mi forward hian Real tan match 22 a khelha goal nga a khungna chiah a ni.

Barakhaih

Real-in minute 25 chhungin goal hnih an khung a, awlsam taka chak turah an inngai hman - an inngaih ang ngawt erawh a ni lo a, minute 60 pawh a tlin hmain si phurh an sut zawh tir!

Minute 39-naah Jacobo Ramon a chesual a, a vawi khat nana Real tana bul ṭantu centre back hi penalty box-ah a handball. Real-in penalty an chawi a, Juan Cruz chuan goal-ah a chantir.

Kum 24 mi attacking midfielder hian a duhtawk mai lo - minute 59-naah a khung belh a, 2-2 a ni der! Real an hawihai. Goal dang a lut lawk lo a, extra time khelh ngai tur angin a lang hman.

Mahse, minute 82-naa luhtir Gonzalo García chuan Real tana a goal hmasa ber chu hun pek belhah a khung a, chakna goal a chang zui - Real-in semifinal an lut.

Naupang rual

Real tan player naupang rual an inlan a, defender Raúl Asencio (kum 21), Jacobo Ramón (20), attacking player Arda Güler (19) leh Endrick (18) te bul ṭantu zingah an tel.

Bench aṭangin chakna goal khungtu, kum 20 mi Gonzalo García a lut bawk a, Real an chak hram. Real coach Ancelotti chuan, "Team pahnih kan inhnehtawk khawp mai.

"Jacob kha a tirah chuan a zam a, mahse, a insiamrem vat. Gonzalo khan reserve team tan season duhawm tak a hmang mek bawk - kan naute khelh danah lawm tur kan ni," a ti.

Real boss chuan sawi zawmin, "Tihsual nei thei an ni a, a pawimawh ber erawh team tana tha an thawh kha a ni. A harsat lai pawha hnehna chan zel hi a pawimawh," a ti a, rawlthar rual huaisenna a fak.