Fulham-ah Willian a kal

Premier League club Fulham chuan Willian chu loan hmangin an hawh a, tun season tawp thleng daih turin inremna an ziak - club a chhuahsan aṭanga thla ruk hnuah a kir leh tihna a ni.

Brazilian winger Willian hian Cottagers tan kum 2022-24 chhung khan a lo khel tawh a, nikum December thla khan Olympiakos chhuahsanin club nei loa a awm hnuah English club bawk a zawm leh ta a ni.

Chelsea leh Arsenal tan pawha khel tawh Willian chuan, "Keimah chauh ni loin kan chhungkua kan hlim, tun season tawp chu nuam ti tak chungin ṭha takin ka khelh theih ka beisei," tiin a sawi.

Kum 36 mi Willian hian tun hmain Fulham tan hian match 67 khelin goal 10 a lo khungsak tawh a, rinrawl tur ni chiah tawh lo mah se a tawnhriat neih tawhte hi a ṭangkai thei ang.

Tun dinhmunah Fulham hian EPL match 24 aṭanga point 36 hmuin pakuana an ni mek a, season an hmang ṭha angreng hle - Inrinni zan hian FA Cup fourth round khel turin Wigan Athletic an lenchilh ang.