Doncic nena khel tur James a phur

LeBron James chuan tunlai NBA player ṭha bik Luka Doncic nen an khel dun thei tur chu a phur hle tih a sawi, an team Los Angeles Lakers tan chuan James leh Doncic te khel dun tur hi chanchin lawmawm a ni ang.

Kum 25 mi Doncic hian kar hmasa khan Dallas Mavericks aṭangin Lakers hi a zawm. Lakers player neih lai Anthony Davis chuan Mavericks a zawm ve thung a, player pahnih chetvel dan hian basketball khawvel a barakhaih hle.

James chuan, "A hluin a danglam dawn hle, mi ten pawhin min ngaihven zual dawn hlein ka hria. Luka hi kum 25 mi chauh a la ni a, player ṭha a ni satliah lo, inkhel pawimawh bikah a hlauhawm zual ṭhin. LA tana theihtawp chhuah dun hi ka chak tawh," tiin a sawi.

Lakers hian nimin zing khan Los Angeles Clippers chu 122-97 in an hneh a, an chak theih nan hian NBA Most Valuable Player (MVP) vawi nga ni tawh James chuan point 26 leh assist vawi 26 a nei a, rebound vawi riat a la bawk.

Inkhel hi Doncic chuan a hmunah a en - nikum December thla khan a hliam a, a la inkhel thei rih lo a ni. Kum 2024 league a point nei tam ber Doncic chuan, "Thil thleng hi kei ngei pawhin mak ta ti ve tho, a nihna tak chuan April 1 emaw ka ti hial," a ti.

Lakers chuan tun thla tawp lamah an player thar Doncic hi chhawr theih an inbeisei.