Arsenal-in champion an hnaih sawt - Seaman
English keeper ropui David Seaman chuan a club hlui Arsenal-in goalkeeper Petr Cech an lakluh avangin Premier League champion an hnaih sawt thu a sawi.
Kum 51-a upa Seaman chuan, "Cech hi Arsenal mamawh tak a ni a, amaherawhchu player pakhat chauh hi champion turin a tawk lo. Patrick Viera leh Yaya Toure te anga midfielder ṭha, midfield lai luah zo tur an mamawh," tiin keeper thar ringawt a tawk loh thu a sawi.
Premier League-a Gunners vawi thum champion puitu keeper chuan sawi chhunzawmin, "Tun hma chuan pawisa ngah tawk loh vangin player duh lai hralh a ngai ṭhin a, entirna ṭha tak chu Cesc Fabregas leh Gael Clichy te kha an ni. Tunah chuan club sum dinhmun a ṭha tawh a, player ṭha la lut turin pawisa a awm a, hlawh ṭha tak an pe thei tawh bawk. Premier League champion tura Arsenal mamawh chu Cech te anga player ṭha hi a ni," tiin a sawi.
Cech hian Czech Republic tan match 91 a khel tawh a, Chelsea tana season 11 a khelh chhungin nomawi 11 a chawi bawk. Nikum season khan league-ah vawi sarih chauh a khel a, Arsenal a zawm chhan chu match tam zawk khelh a duh vang a ni.
England tana vawi 75 khel thei Seaman chuan, "Arsenal-ah hian bench-a ṭhu turin Cech hi a lo kal lo. Sulhnu ṭha tak a nei a, tun hi a vanglai tak tur a ni. Kum nga emaw kum ruk emaw chu ṭha takin a la khel thei ang," tiin Wojciech Szczesny leh David Ospina ten Cech an ken a ngaih tur thu sawi.
FA Cup champion lai Arsenal hian kum 2004 hnuah Premier League nomawi an la chawi leh lo a, nikum khan point 12-in champion Chelsea an pha lo.
Chelsea-in Cech awm loh an tuar tur thu sawiin Seaman chuan, "Cech hian mize nghet tak a nei a, player inringtawk tak a ni. Mipui zinga thu a sawi changin goalkeeping lam sawi nuam a ti. Hetiang ang player ṭha an chan hi chu Chelsea hian an tuar ve khawp ang. Ani anga keeper ṭha hi chuan club thlan theih tur a ngah dawn a, Arsenal a thlang hi ka lawm hle a ni," a ti.
Arsenal keeper thar Cech chuan Chelsea a zawm hma khan Arsene Wenger-a hnuaia a khelh hman ṭep thu a sawi chhuak.
Czech Republic keeper chuan, "Kum 2002 daih tawh khan Arsenal zawm thei ka ni a, amaherawhchu work permit neih a harsat avangin ka zawm lo. Kum 13 hnuah Arsenal zawm chauh mah ila ka tisual chuang loin ka hria, Chelsea tan nomawi ṭhahnem tak ka dawng a, Arsenal-ah chhunzawm ka tum ang," tiin a sawi.
Cech leh Chelsea champion-nate
Champions League : 2012
Premier League : 2005, 2006, 2010,
2015
Europa League : 2013
FA Cup : 2007, 2009, 2010,
2012
League Cup : 2005, 2007,2015
Community Shield : 2005, 2009