Milan derby-ah chak zawk awm lo

Pathianni zan khan Milan derby khelh a ni a, AC Milan-in hnehna an chang dawn emaw tih hnu, hun pek belhah Inter Milan-in Stefan de Vrij hmangin si phurh an sut a, 1-1 in an inhnehtawk.

Milan tan Tijjani Reijnders chuan minute 45-naah goal hmahruai a khung a, Rafael Leao-a shot chu Inter keeper Yann Sommer chuan dang perin, a per lehlam hi Reijnders hian goal-ah a lo chantir.

Manchester City captain hlui Kyle Walker-a'n AC Milan tan a match hmasa ber khelin, minute 90 a khel tluan nghal a, Milan derby-ah a team a chakpui nghal teuh hle.

Mahse, hun pek belh minute thumnaah Stefan de Vrij a inlar a, Nicola Zalewski-a'n a awma a dan thlaksak chu Dutch centre back hian hnai set sawtah a khung - hun a tawp a, 1-1 a ṭinin, team pahnihin point an insem.

AC Milan-in hun pek belha goal an chhuah avangin vanduai an inti ang a, mahse, inkhel pumpui thlir chuan Inter-in vanduai an inti zawk a nih pawhin a awm lo hran lo.

Inter tan hian Yann Aurel Bisseck, Marcus Thuram leh Denzel Dumfries ten chance duhawm neiin, woodwork an tihper vek a, AC Milan an vannei takzet - Dumfries-a chance neih dang chu AC Milan keeper Mike Maignan chuan a thlawn a chantir bawk.

Simone Inzaghi enkawl Inter-in hnehna chang zo lo mah se, an lawmna turin hmahruaitu Napoli an chak zo bik lo. Antonio enkawl team hian AS Roma lakah Leonardo Spinazzola hmangin goal hmahruai an khung a, an chakpui dawn emaw tih hnuah Angeliño chuan hun pek belhah Roma tan si phurh a sut.

Inter hian Napoli chu point thumin an phak lo mek a, AC Milan erawh pariatnaah awmin, palina Juventus chu point ngain an phak lo mek.