Goal li khungtu Bagan

Team talbuai Mohammedan SC an tlawm leh ta - Inrinni zan khan Mohun Bagan chuan 4-0 in an sawp a, Subhasish Bose leh Manvir Singh ten goal hnih ve ve an khung a, Mohammedan midfielder Mirjalol Kasimov chu first half hun pek belhah hnawhchhuah a ni bawk.

Coach Andrey Chernyshov nena inṭhen hlim Mohammedan tan Joe Zoherliana, Vanlalzuidika Chhakchhuak leh Lalremsanga Fanai ten inkhel bul an ṭan a, bench aṭangin Lalrinfela Khiangte a lut bawk - Bagan tan ṭum dang ang thoin Lalengmawia Ralte (Apuia) a khel tluan.

Hetihlai hian Inrinni zan inkhel hmuhnawmah Punjab FC chuan 3-2 in Bengaluru an hneh bawk. Bengaluru tana Edgar Mendez goal hmahruai chu Punjab hian Asmir Suljic leh Filip Mrzljak hmanga chhangletin, 2-1 a ni.

Hun pek belh minute hnihnaah Bengaluru tan Rahul Bheke chuan khung ve lehin, an inhnehtawk tawh mai dawn niin a lang hman a, mahse, hun pek belh minute ruknaah Luka Majcen chuan chakna goal a khung - Bengaluru tan Lalremtluanga Fanai chu bench aṭangin a lut.

Zirtawpni zan khan Mumbai City chuan East Bengal an mikhual a, 0-0 in an ṭin. Mumbai tan Hmingthanmawia Ralte (Valpuia) leh Lallianzuala Chhangte ten inkhel bul an ṭan a, East Bengal tan Lalchungnunga leh David Lalhlansanga ten bul ṭanin, Mark Zothanpuia chu bench aṭangin a lut bawk.